IDADAIT 2026 MALINAWONG GIPAHIGAYON SA ZSP-PDEA KARONG ADLAWA

Thata Manlapaz

IPIL, Zamboanga Sibugay — Nagtinabangay ug nagkahiusa ang lain-laing ahensya sa gobyerno, mga lider sa kabatan-unan, ug mga partisipante lakip na ang mga CICL sa pagsaulog sa International Day Against Drug Abuse and Illicit Trafficking (IDADAIT) 2026. Ang kalihukan gipahigayon sa Bahay Pag-asa sa Brgy. Ipil Heights, ning Lunes, Hunyo 29, 2026. Nagsugod kini sa pag-ampo ug pag-awit sa nasudnong awit.

Sa iyahang mensahe, si PDEA Provincial Officer Ciellito E. Llano nag-ingon nga kinahanglan magtinabangay ang tanan aron mapugngan ang pagkaylap sa droga. Gipahinumdoman niya nga ang pagbatok sa droga dili lang trabaho sa mga pulis ug ahensya, apan katungdanan sa tanang tawo.

Gisuportahan usab kini ni DILG Assistant Provincial Director Benonie A. Galambao, nga nagpasalamat sa tanang nagtinabangay aron matudloan ang mga tawo, ilabi na ang mga kabataan, sa daotang epekto sa ilegal nga droga.

Si Board Member Hersheymae Senarlo, nga maoy pangulo sa SK Federated, miingon nga dako ang papel sa mga kabataan sa paghimo ug maayong katilingban. Siya usab ang nangulo sa panumpa, diin ang tanan misaad nga mosuporta sa kalihukan batok sa droga.

Gipasabot usab sa PDEA ang tumong sa IDADAIT ug nganong importante ang pag-apil sa matag usa. Human niini, gipahigayon ang Larong Pinoy aron mapalig-on ang panaghiusa ug kooperasyon sa mga partisipante.

Nagkauban usab sila sa paniudto aron mas makaila ug magtinabangay pa. Gihatagan usab ug pag-ila ug premyo ang mga mananaog sa mga dula. Sa katapusan, si Bahay Pag-asa Manager Stephanie Glenn Pasaforte mihangyo nga ipadayon ang suporta sa maayong mga programa.

Gitapos ang kalihukan pinaagi sa sayaw isip timaan sa panaghiusa ug paglaum. Naghatag usab ug libre nga hygiene kits ug grocery items gikan kay Congresswoman Marly Hofer-Hasim ug uban pang lokal nga opisyal.

Ang maong kalihukan malampuson nga nahuman ug nagpakita nga kung magkahiusa ang gobyerno, kabataan, ug komunidad, mas dali makab-ot ang luwas ug walay droga nga lugar.