MARCOS GIPASIDUNGGAN SI ALEX EALA TUNGOD SA MAKASAYSAYANONG KADAUGAN SA WIMBLEDON

Thata Manlapaz

IPIL, Zamboanga Sibugay– Gipasidunggan ni Pangulong Ferdinand "Bongbong" Marcos Jr. ang Filipina tennis sensation nga si Alex Eala human kini nakahimo ug kasaysayan isip unang Pilipino nga nakaabot sa fourth round sa prestihiyosong Wimbledon Grand Slam Tournament.

Sa iyahang mensahe pinaagi sa social media, giingon sa Pangulo nga dako ang garbo nga gibati sa tibuok nasud tungod sa talagsaong nahimo ni Eala. Matud niya, kini usa ka higayon diin ang tanang Pilipino nagkahiusa sa pagsaulog sa usa ka dakong kalampusan.

Gipadayag usab ni Marcos nga nagtuo siya nga ang bag-ong kalampusan ni Eala dili pa mao ang kinatumyan sa iyahang karera. Sumala kaniya, nagsugod pa lamang ang batan-ong atleta sa pagpakita sa iyahang tinuod nga potensyal sa internasyunal nga entablado.

Nagpasalamat usab ang Pangulo kang Eala tungod sa inspirasyon nga iyahang gihatag sa kabatan-unang Pilipino. Iyahang giingon nga pinaagi sa determinasyon ug paningkamot ni Eala, napamatud-an nga ang mga damgo sa mga Pilipino mahimong matuman bisan pa sa pinakadakong kompetisyon sa kalibutan.

Ang 21-anyos nga si Eala, nga karon anaa sa ika-29 nga pwesto sa world rankings, nakapasigarbo sa daghang mga tennis fans human niyang mapildi ang depending Wimbledon champion ug world No. 3 nga si Iga Swiatek sa Poland sa iskor nga 7-6(9), 6-2 sa ikatulong hugna sa torneyo.

Sa maong duwa, nakalikay si Eala sa duha ka set points sa unang set pinaagi sa usa ka lisod nga tiebreak, sa wala pa niya hingpit nga gidaog ang ikaduhang set. Kini ang gikonsiderar nga pinakadakong kadaugan sa iyahang propesyonal nga karera hangtod karon.

Tungod niini, nahimo siyang unang Pilipino sa Open Era nga nakaabot sa ikaduhang semana sa usa ka Grand Slam tournament, usa ka makasaysayanong rekord alang sa Philippine tennis.

Sa sunod nga hugna, atubangon ni Eala ang Italyanong si Jasmine Paolini, nga kasamtangang world No. 13 ug runner-up sa Wimbledon niadtong 2024. Ang ilahang duwa sa fourth round gikatakdang ipahigayon karong adlawa, Lunes, diin naglaom ang tibuok nasud nga ipadayon ni Eala ang iyahang talagsaong kampanya sa Wimbledon.

Samtang nagpadayon ang iyahang makasaysayanong pakigsangka, nagkahiusa ang mga Pilipino sa pagdasig ug pag-ampo alang kang Alex Eala, nga padayon nga nagdala ug dungog ug inspirasyon sa Pilipinas sa tibuok kalibutan.