PUNONG BARANGAY SA TENAN MISUPAK SA SAYOP NGA PAGHISGOT SA DIREKSYON SA PAG-IKYAS SA MGA SUSPEK

Daphne Santuyo

IPIL, Zamboanga Sibugay – Pinaagi sa iyang Facebook account, nagpaabot ug mensahe sa publiko ang Punong Barangay sa Tenan sa lungsod sa Ipil nga si Hon, Medz Far Ali, aron ipadayag ang iyang dakong pagkadismaya ug kabalaka human nga migawas ang mga post sa Social media partikular na sa Facebook usa ka lokal nga FM Station sa lungsod ug sa pipila ka netizens nga nag-ingon nga ang mga suspek sa pagpamusil nga nahitabo kagabii “paingon sa Barangay Tenan.”

Sumala sa Punong Barangay, ang maong pamahayag makapahisalaag ug walay lig-on nga basehan, tungod kay sa pagkakaron wala pay opisyal nga kumpirmasyon gikan sa Philippine National Police nga nagapamatuod nga ang mga suspek miagi o misulod sa Barangay Tenan human sa krimen. Matud pa niya, ang dali-dali ug walay klarong beripikasyon nga paghinganlan sa ilang barangay nakahatag ug sayop nga impresyon sa publiko ug nakapahinungdan sa kahadlok ug kabalaka sa mga residente.

Gipatin-aw sa Punong Barangay nga ang Barangay Tenan dili lamang ang posibleng agianan padulong sa Kabasalan, kundili daghan pang ubang barangay ug alternatibong ruta nga mahimong agian sa mga suspek. Busa, ang pagpakita nga murag sigurado na ang direksyon sa ilang pag-ikyas usa ka klarong distortion sa kamatuoran ug dili makiangayon alang sa ilang komunidad.

“Ang among barangay nahimong punto sa diskusyon ug kahadlok sa social media bisan pa nga wala pa’y lig-on nga ebidensya,” matud pa sa Punong Barangay. Iyang gidugang nga ang maong pahayag nakadaot sa reputasyon sa Barangay Tenan ug nakahatag ug peligro sa kaluwasan sa mga residente, ilabi na sa mga inosenteng molupyo nga walay kalambigitan sa insidente.

Gibutyag usab niya nga ang media adunay dakong papel ug responsibilidad sa paghatag ug tinuod, sakto, ug balanse nga impormasyon, ilabi na sa mga sensitibong panghitabo sama sa krimen. Ang sayop nga pagreport, matud pa niya, makapahisalaag sa publiko, makapukaw sa panic, ug makapahuyang sa pagsalig sa mga tawo sa media.

Busa, iyang giawhag ang mga media outlets nga mohimo ug klaro ug pormal nga correction sa ilang post ug mas magmatngon sa umaabot pinaagi sa hustong pag-verify sa impormasyon gikan sa otoridad sa dili pa ipagawas sa publiko.

Sa laing bahin, gihatagan ug gibug-aton sa Punong Barangay nga ang Barangay Tenan magapadayon sa ilang commitment sa kalinaw ug kahapsay, ug bug-os nga andam nga makigtambayayong sa kapulisan ug uban pang law enforcement agencies alang sa hustisya ug sa pagdakop sa mga responsable sa krimen.

Iyang gipahinumduman nga dili nila tugotan nga madungagan ug sayop nga dungog ang ilang barangay tungod sa iresponsableng pagreport ug walay basehang paghusga. “Ang hustisya kinahanglan ibase sa kamatuoran, dili sa mga panagna ug walay klarong impormasyon,” matud pa niya.

Sa katapusan, iyang giawhag ang tanang sektor -media, netizens, ug komunidad, nga maglihok uban ang responsibilidad, kaangayan, ug pagtahod sa kamatuoran, alang sa kaluwasan ug kalinaw sa tanan. Sa laing bahin, giedit na usab sa 92.7 XFM-Ipil ang maong balita nga gi-post sa Facebook isip pagrespeto sa panawagan ni Kapitan Ali ug matud pa sa management sa maong sibyaanan, ug matud pa, walay malisya ang ilang pagsulat sa maong balita ug buot nilang ipaabot ang ilang pagpangayo ug dispensa ngadto sa mga katawhan sa Barangay Tenan.