CONG. MARLO BANCORO GIDUSO ANG BALAOD-NON SA PAGMUGNA SA MALANGAS MEDICAL CENTER

Daphne Santuyo

IPIL, ZAMBOANGA SIBUGAY – Aprobado na sa committee level sa Committee on Health sa Kamara de Representante ang House Bill No 3391, An Act Establishing in the Municipality of Malangas, Province of Zamboanga Sibugay, a Hospital to be Known as the Malangas Medical Center (MMC) and Appropriating Funds Therefor, nga giduso sa representante sa first district sa lalawigan sa Zamboanga Sibugay nga si Cong. Marlo Bancoro.

Matud pa ni Cong. Bancoro, nakatakda nang itaho ang maong balaod-on ngadto sa plenaryo ug pagkahuman niini, ikonsiderar na kini alang na sa second reading.

Sumala pa sa HB No 3391, i-establisar ang MMC sa lungsod sa Malangas diin mamahimo kining usa ka 200-bed capacity hospital ubos sa pagdumala sa Department of Health (DOH).

Nahipatik usab sa explanatory note ni Cong. Bancoro nga sukad sa pagkamugna sa lalawigan sa Zamboanga Sibugay, daghan na ang mga kalambuan nga nahitabo dinhi apan aduna pa gihapoy panginahanglanon sa mapadayunong paningkamot aron nga mapalig-on ang sebisyo sa katawhan ug imprastraktura lakip na ang healthcare.

Gidugang pa ni Bancoro sa explanatory note niini nga ang Malangas, usa sa pinakauna nga mga lungsod bisan pa man sa kanhing mother-province sa lalawigan sa Zamboanga Sibugay nga Zamboanga del Sur, ug tungod sa nagkadaghan nga mga pasyente ug padayon nga panginahanglanon sa mas maayong serbisyo sa kahimsog sa panglawas sa lungsod sa Malangas ug sa mga silingang lungsod niini, ang pag-establisar sa MMC nga magdugang sa bed-capacity, moderno nga mga pasilidad, dugang serbisyo lakip na ang plantilla personnel gikinahanglan gayud.

Suportado usab sa lokal nga panggamhanan sa lungsod sa Malangas ang ginaduso nga balaod-non tungod kay usa usab sa prayoridad sa mayor nga si Apple Cabilao-Yambao nga usa ka doctor ang serbisyo sa panglawas.

Sa gipahigayon nga pulong sa komitiba sa Kongreso, nagpakita usab sa iyang dakong suporta ang kongresista sa 2nd district sa Zamboanga Sibugay nga si Doc Marly Hofer-Hasim pinaagi sa iyang pag “second the motion”.