LALAKI SIKOP SA ENTRAPMENT OPERATION SA IPIL TUNGOD SA POSIBLENG CHILD SEXUAL ABUSE

Thata Manlapaz

Ipil, Zamboanga Sibugay –Arestado ang usa ka 47-anyos nga lalaki sa usa ka entrapment operation nga gipahigayon sa mga operatiba sa CIDG Martes sa gabii, bandang ala-7:30 ang takna, Abril 7, 2026, sa Brgy. Sanito ning lungsod.

Ang dinakpan nailhan sa alyas "ATO NI BAI", ulitawo, usa ka Bajaj driver ug kanhi Barangay Kagawad sa Brgy. Maasin ning lungsod sa Ipil.

Base sa taho, ang operasyon nahitabo sa Brytlights Pension House nga gisugdan bandang alas 5:30 ang takna sa hapon nga milungtad hangtud alas 7:30 ang takna sa gabii. Gipangunahan kini sa CIDG Zamboanga Sibugay Provincial Field Unit, uban sa koordinasyon sa MSWD Ipil ug Ipil Municipal Police Station.

Ang operasyon gisugdan human mingdangop ang inahan sa menor de edad nga biktima. Sumala sa reklamo, ang suspek adunay komunikasiyon sa bata pinaagi sa Messenger ug giimbitar kini nga magtagbo sa usa ka motel alang sa malaw-ay nga katuyuan. Giangkon usab sa suspetsado ang plano sa pagbuhat ug malaw-ay nga lihok batok sa menor de edad.

Pagkahibalo sa insidente, dayon kining gisulti sa bata sa iyahang inahan nga maoy midangop sa mga otoridad.

Human sa koordinasyon sa mga ahensya ug barangay, gilunsad ang entrapment operation nga mitultol sa pagdakop sa suspek sulod mismo sa kwarto sa pension house sa wala pa mahitabo ang gituuhang krimen.

Sa dihang gidakop, gipahibalo ang suspek sa rason sa iyahang pag-aresto ug sa iyahang katungod subay sa balaod. Dayon siya gidala sa opisina sa CIDG sa Ipil alang sa hustong dokumentasyon ug temporaryong detensyon samtang giandam ang pagsaka sa kaso sa korte.

Narekober gikan sa suspek ang iyang driver’s license ug usa ka Android cellphone.

Gisaksihan ang operasyon sa representante sa MSWD Ipil ug usa ka Barangay Kagawad. Gidokumento usab kini pinaagi sa body-worn cameras subay sa mga lagda sa korte.

Ang suspek posibleng mag-atubang sa kaso ubos sa Republic Act 7610 o ang balaod batok sa pag-abuso sa kabataan, inubanan sa Republic Act 10175 o Cybercrime Prevention Act.

Padayon pa ang imbestigasyon sa maong insidente.