Top 16 sa Inter-Barangay Communal Vegetable Gardening Contest Gibutyag Na

Daphne Santuyo

Malipayong gipadayag sa Office of the Provincial Agriculturist (OPAg) sa lalawigan sa Zamboanga Sibugay ang Top 16 nga mga entries sa Inter-Barangay Communal Vegetable Gardening Contest, usa ka programa nga nagpakita sa panaghiusa, kakugi, ug pagkamamugnaon sa nagkadaiyang komunidad sa probinsya. Ang maong anunsiyo gihimo pinaagi sa opisyal nga Facebook Page sa maong buhatan nga Opag Zamboanga SIbugay.

Sumala sa mga organizers, ang maong kumpetisyon naglangkob sa pagpalambo sa sustainable agriculture ug communal gardening, nga nagdasig sa mga barangay sa pagpananom og mga utanon alang sa kaayohan sa komunidad.

Ang mosunod mao ang Top 16 nga barangay nga napili tungod sa ilang maanindot ug epektibong communal vegetable gardens:

• Barangay Crossing Sta. Clara, Naga • Barangay Suclema, Ipil • Barangay Sta. Fe, Titay • Barangay Buyogan • Barangay Taway, Ipil • Barangay Milagrosa, Alicia • Barangay Mali Little Baguio, Imelda • Barangay Bulawan, Payao • Barangay Sininan, RT Lim • Barangay Sto. Niño, Alicia • Barangay Veterans, Ipil • Barangay Siawang, R.T. Lim • Barangay San Antonio, Titay • Barangay Makilas, Ipil • Barangay Del Monte, Buug • Barangay Del Pilar, Malangas

Gipadayag usab nga ang Office of the Provincial Agriculturist magahimo og onsite visitation aron personal nga husgahan ang Top 3 ug mga grand winners sa kompetisyon.

Ang maong panagsangka usa ka proyekto sa Office of the Provincial Agriculturist sa Zamboanga Sibugay, nga tumong niini ang pagpalig-on sa food security, ug pagdasig sa aktibong partisipasyon sa komunidad sa agrikultura.

Gipasidunggan sa mga organizers ang tanang barangay nga nipartisipar, ilabi na ang mga napiling entries, tungod sa ilang dedikasyon ug paningkamot sa pagpalambo sa communal gardening nga makatabang sa katilingban.

Gipahinumduman usab ang tanang partisipante nga magsumiter og upat (4) ka hulagway sa ilang feeding program isip kabahin sa requirements sa kumpetisyon. Kini nga mga hulagway magpakita sa positibong epekto sa communal vegetable gardening sa katawhan.

Gipasalamatan sa OPAg ang tanang barangay ug boluntaryo nga miapil, ug gidayeg ang ilang paningkamot sa paghimo og mas luntian, lig-on, ug malungtarong kaugmaon alang sa Zamboanga Sibugay.