77TH ARAW NG IPIL, ANDAM NA SA HUGOT NGA SELEBRASYON SA LUNGSOD

Thata Manlapaz

IPIL, Zamboanga Sibugay – Andam na ang lungsod sa Ipil alang sa dakong kasaulugan sa 77th Araw ng Ipil human opisyal nga gipahibalo sa Local Government Unit (LGU) sa Ipil ang tibuok iskedyul sa mga kalihukan nga pagahimuon ubos sa temang "Malambuon nga Ipil, Garbo sa Katawhan."

Ang opisyal nga selebrasyon pagahimuon gikan sa Hulyo 20 hangtod Hulyo 26, 2026, diin nagkadaiyang programa ang giandam aron mapalambo ang panaghiusa sa komunidad ug mahatagan ug higayon ang tanang Ipileños nga makig-uban sa kasaulugan.

Matud pa sa LGU Ipil, ang usa ka semana nga selebrasyon maglakip sa daghang kalihukan sama sa mga pasundayag sa kultura ug turismo, kompetisyon sa sports, mga serbisyo sa gobyerno, programa alang sa kabatan-unan, kalihukan sa agrikultura ug negosyo, ingon man uban pang mga aktibidad nga nagpakita sa padayon nga kalambuan sa lungsod.

Apan bisan wala pa magsugod ang opisyal nga semana sa Araw ng Ipil, magsugod na ang mga Special Events sugod Hulyo 11. Lakip niini ang nagkadaiyang sports tournaments, ang gihulat sa daghang residente nga Ipil Night Market, ug uban pang mga kalihukan nga mahimong apilan sa mga lumulupyo ug mga bisita.

Gilauman nga pinaagi sa maong mga aktibidad, dili lamang malingaw ang katawhan kundili mas mapalig-on usab ang panaghiusa ug aktibong partisipasyon sa komunidad sa pagsaulog sa ika-77 nga anibersaryo sa lungsod.

Sumala sa LGU Ipil, ubos sa pagpangulo ni Mayor Hon. Ramses Troy "Rambo" D. Olegario, ang kasaulugan dili lamang pagtimaan sa anibersaryo sa Ipil, kundili usa usab ka higayon sa pagpasalamat sa mga nahimog kalampusan sa lungsod, pag-ila sa kontribusyon sa matag Ipileño, ug pagpakita sa garbo sa usa ka komunidad nga nagtinabangay alang sa padayon nga kalambuan.

Busa, giawhag sa LGU ang tanang mga residente ug mga bisita nga moapil sa nagkadaiyang kalihukan aron dungan nga saulugon ang 77th Araw ng Ipil ug ipakita ang panaghiusa, garbo, ug gugma alang sa lungsod.