GRADE 12 SHS SA MARCELO SPINOLA SCHOOL, NAGHATAG KALIPAY UG PAGLAUM SA MGA PASYENTE SA DGTHMC

Thata Manlapaz

IPIL, ZAMBOANGA SIBUGAY- Nakahatag ug dakong kalipay ang pagbisita sa mga Grade 12 Senior High School nga mga estudyante sa Marcelo Spinola School ngadto sa Dr. George T. Hofer Medical Center (DGTHMC) niadtong Enero 21, 2026.

Ang maong kalihukan usa ka buhat sa kaluoy ug pag-alagad nga nagbilin ug dakong kahulugan sa kasingkasing sa mga pasyente ug sa tibuok komunidad sa ospital. Atol sa maong pagbisita, ang mga estudyante nagpaambit sa Ebanghelyo ug nagpaabot ug mga pulong sa pagdasig ug paglaum sa mga pasyente nga anaa sa mga ward.

Pinaagi sa ilahang yano apan tinud-anay nga presensya, nakahatag sila ug emosyonal lakip na espiritwal nga kusog sa mga nagapaayo sa ilahang balatian. Dakong tabang ang susamang mga kalihukan sa proseso sa pag-ayo sa usa ka pasyente, tungod kay dili lamang lawasnon nga pag-atiman ang ilahang nadawat, apan lakip usab ang pagpalig-on sa hunahuna ug espiritu.

Dili lamang ang mga pasyente ang nakabenepisyo sa maong pagbisita. Ang mga estudyante usab nakakita ug aktuwal nga kahimtang sa pag-alagad panglawas, ug mas nasabtan nila ang importansya sa trabaho sa mga health workers sa ospital. Pinaagi niini, mas napalapdan ang ilahang kahibalo ug nahimo silang mas sensitibo sa kahimtang sa uban, ilabi na sa mga nagkinahanglan ug tabang ug pag-atiman.

Ang maong kalihukan nagpalig-on sa panaghiusa tali sa mga eskwelahan ug mga health centers sa komunidad, ug nagdasig sa espiritu sa pagkamaloloy-on, pag-alagad, ug responsibilidad sa mga kabatan-unan.

Kini usa ka ehemplo nga ang pagkat-on dili lamang mahitabo sulod sa classroom, kundili usab sa tinuod nga kinabuhi ug pagpakig-uban sa komunidad.

Nagpasalamat pag-ayo ang Dr. George T. Hofer Medical Center sa mga administrador ug magtutudlo sa Marcelo Spinola School sa pag-organisar sa maong tinuig nga pagbisita sa ospital. Ang ilahang dedikasyon sa paghatag ug tinuod nga kasinatian sa pagkat-on sa mga estudyante nagpakita sa ilahang dakong pagtagad sa ilahang holistic development, pagpalambo sa pakigdait, disiplina, ug pagbati sa pag-alagad nga ilahang madala bisan pa paghuman na sa ilahang pag-eskwela.