UNANG HIGAYON: ZAMBOANGA SIBUGAY MINGSALMOT SA SINULOG 2026 UBAN ANG 300 KA DANCERS

Thata Manlapaz

IPIL, ZAMBOANGA SIBUGAY- Mingsalmot sa unang higayon ang probinsiya sa Zamboanga Sibugay sa prestihiyosong Sinulog Festival Dance Competition 2026 nga gipahigayon sa dakbayan sa Cebu, uban sa suporta gikan kang Governor Ann K. Hofer ug Congresswoman Doc Marly Hofer-Hasim.

Sumala sa mga tigpasiugda sa Sinulog, 37 ka mga contingents nga naggikan sa nagkalain-laing probinsiya ug dakbayan sa nasud ang misalmot sa maong Festival karong tuiga. Usa ka dakong garbo alang sa Sibugay nga nakaapil kini sa maong dakong cultural event, ilabi na kay unang higayon pa kini nga adunay opisyal nga entry ang probinsiya.

Ang Zamboanga Sibugay contingent naglangkob sa 300 ka mga partisipante nga usa ka dako ug organisadong grupo. Gihatagan sila sa suporta gikan sa pagbiyahe gikan sa Sibugay padulong sa Dapitan City, lakip na ang suporta pinansiyal ug pagkaon sulod sa duha ka adlaw, nga gisiguro ni Gov. Ann Hofer ug Cong. Doc Marly Hofer-Hasim aron mas hapsay ug walay kabalaka ang ilahang partisipasyon sa Sinulog.

Pinaagi sab sa koordinasiyon nga gihimo ni Atty. Christian Jay Millena, ang Provincial Administrator sa Zamboanga Sibugay, sa pagpaabot sa panginahanglanon sa mga partisipante ngadto sa Panggamhanang Probinsiyal, nahimong posible ang pagtubag sa gikinahanglan aron makasalmot ang Sibugay sa Sinulog sa unang higayon.

Ang choreography ug pag-andam sa mga partisipante gipangunahan ni Emerald Helar kauban ang Emerald Touch Dance Company, nga maoy nagdumala sa sayaw, porma, ug kahapsay sa grupo. Karon anaa sa Cebu City ang mga partisipante alang sa ilahang final nga pasundayag, kauban ang ubang mga grupo nga misalmot sa kompetisyon. Ang pag-apil sa Zamboanga Sibugay sa Sinulog Festival Dance Competition 2026 usa ka dakong lakang sa pagpakita sa kultura, talento, ug pagkahiusa sa mga Sibugaynon, ug nagpakita usab sa lig-on nga suporta sa panguluhan sa probinsiya alang sa sining ug kultura.