Panimalay Naugdaw sa Purok Pines 2, Sanito

Daphne Santuyo

IPIL, ZAMBOANGA SIBUGAY - Usa ka panimalay ang na-ugdaw niadtong sayo sa kabuntagon sa Enero 15, 2026, alas 7:30 sa buntag, sa Purok Pines 2, Barangay Sanito sa Ipil, Zamboanga Sibugay.

Sumala sa mga awtoridad, padayon pa karon ang imbestigasyon sa Bureau of Fire Protection (BFP) ug sa mga kapulisan aron masuta ang hinungdan sa maong sunog.

Matod pa sa tag-iya sa balay nga gi-interbyu sa mga opisyales sa barangay, adunay nadungog nga buto sulod sa kwarto sa wala pa midilaab ang kalayo. Human niini, ilang nakita ang kusog nga pagdilaab sa sunog, hinungdan nga dali silang migawas sa balay. Nadala sa tag-iya ang iyang gagmayng anak samtang nag-ikyas. Gisiguro matud pa sa tag-iya sa panimalay nga madala ang mga bata ilabi na kay layo ang mga silingan sa ilang panimalay.

Gipadayag usab sa tag-iya nga walay kuryente ang maong balay sa dihang nahitabo ang sunog. Sa karon, wala pa matino kung unsang butanga ang mibuto ug nagpasugod sa kalayo.

Ang nasunog nga panimalay gipanag-iya ni Dodo Casipong, residente sa maong lugar. Ang balay hinimo sa mga light materials, hinungdan nga paspas nikatag ang maong sunog.

Padayon pa ang imbestigasyon sa Bureau of Fire Protection aron matino ang tinuod nga hinungdan sa sunog ug aron masuta kung adunay nalapas nga safety measures sa maong panghitabo.