ENGKWENTRO SA PAGADIAN: 3 PATAY, APIL ANG POLICE INTELLIGENCE OFFICER
Ipil, Zamboanga Sibugay — Tulo ka tawo, lakip ang usa ka police intelligence officer, ang namatay human misikad ang usa ka armado nga engkwentro atol sa police operation sa Purok Malipayon, Barangay Dao, Pagadian City niadtong Domingo sa kaadlawon, Agosto 23, 2026.
Ang pulis nga namatay giila sa mga awtoridad nga si PMAJ Aiman Khuzaimah P. Pantaran, 35 anyos, intelligence officer sa Pagadian City Police Station.
Ang duha pa ka biktima giila nga sila Jhonny Bravo Gomez ug Jerry Bravo Gomez, nga giingong mga target sa operasyon tungod sa ilang gituohang kalambigitan sa illegal nga pagpanag-iya ug pagbaligya og armas.
ADVERTISEMENT
Matud sa Zamboanga del Sur Police Provincial Office (ZSPPO), gipahigayon sa mga pulis ang operasyon batok sa duha ka lalaki. Apan atol sa operasyon, mibuto ang insidente sa pagpamusil human giingong nakabantay ang mga target nga mga law enforcement personnel ang ilang kaatubang.
Misangpot kini sa gunbattle tali sa duha ka grupo. Naigo sa bala si Pantaran ug dali siyang gihatod sa ospital, apan wala na kini maluwas ug gideklarar nga patay pasado alas-12:50 sa kaadlawon.
Ang duha ka target sa operasyon namatay usab human makaangkon og mga samad pinusilan atol sa engkwentro.
Padayon pang gitigom sa mga imbestigador ang mga ebidensya ug impormasyon aron masuta ang tibuok detalye sa nahitabong insidente ug matino ang hustong mga sirkumstansya nga misangpot sa engkwentro.
Samtang, gipasalig sa ZSPPO nga magpadayon ang kapulisan sa pagpatuman sa ilang mga operasyon nga adunay pagrespeto sa balaod, due process ug mga katungod sa tawo, uban sa propesyonal ug responsable nga pagdumala sa matag police operation.
