KAT DE CASTRO MINGHANGYO SA PUBLIKO UG PAG-AMPO ALANG SA IYAHANG AMAHAN

Thata Manlapaz

IPIL, ZAMBOANGA SIBUGAY- Nag-awhag ug pag-ampo sa publiko si Kat de Castro, kanhing TV journalist ug karon Undersecretary sa Department of Tourism (DOT), human siyang mipost sa social media ug minghangyo para sa iyahang amahan nga si kanhing vice-president Noli “Kabayan” de Castro, usa sa pinakailado ug ginasaligan nga broadcaster sa nasud.

Sa iyahang mensahe, wala gipadayag ni Kat ang eksaktong rason nganong nangayo siya ug pag-ampo, hinungdan nga misamot ang kabalaka sa daghang netizens ug mga followers ni Kabayan. Labi pang nadugang ang pangutana sa publiko tungod kay pila na ka adlaw nga wala makita si Noli de Castro sa iyang regular nga programang “TV Patrol.” Ang kalit nga hangyo sa pag-ampo ug ang wala damha nga pagkawala ni Kabayan sa telebisyon maoy hinungdan nga daghang viewers ang nangutana kon unsa ba ang tinuod niyang kahimtang.

Daghang netizens ang nagpadayag sa ilahang kabalaka, samtang ang uban naghinumdom sa dakong kontribusyon ni Kabayan sa media ug sa serbisyo publiko sulod sa daghang katuigan. Sa kasamtangan, wala pa’y gipagawas nga opisyal nga pamahayag gikan sa iyang pamilya o sa network kabahin sa rason sa iyang pagkawala sa programa.

Bisan pa niini, padayon ang pagpa-abot sa mga mensahe sa suporta, pag-ampo, ug maayong panghinaot gikan sa iyahang mga kauban sa media, higala, ug tagasuporta. Naglaum ang kadaghanan nga unsa man gani ang kahimtang ni Kabayan karun unta siya luwas, maayo ang lawas, ug makabalik dayon sa pagserbisyo sa publiko nga dugay na niyang gihimo pinaagi sa media.