30 MILYONES NGA KANTIDAD SA MGA MEDICAL EQUIPMENT SA LGU IPIL NGA NATAMBAK SUKAD PA 2021 GIINSPEKSIYON NA SA SUPPLIER SA UNANG HIGAYON -2 KA MGA EKWIPO POSIBLENG DEPEKTIBO NA

Daphne Santuyo

IPIL, ZAMBOANGA SIBUGAY – Gipahigayon na sa mga representante sa Jordal Medical System, Inc., ang supplier sa nagkantidad sa 30 milyones ka pesos nga medical equipment sa Lokal nga Panggamhanan sa lungsod sa Ipil ang pag-inspeksiyon sa delivery nga nahitabo niadto pang unang bahin sa tuig 2021.

Ang maong mga medical equipment gilangkuban sa 2 ka units nga ultrasound machine nga nagkantidad sa P11,981,000.00, 2 ka units sa X-Ray machine nga nagkantidad sa P7,998,000.00, 2 ka units nga Cardiac Monitor nga nagkantidad sa P500,000.00, 2 ka units nga Mechanical Ventilators nga nagkantidad sa P7,999,200.00, 2 ka units nga Blood Bag Tube Sealer nga nagkantidad sa P999,800.00 ug 2 ka units nga Blood Roller Mixer nga nagkantidad sa P500,000.00.

Sa mga giabrehan ug na-inspect nga mga ekwipo, 2 niini ang nakita nga posibleng depektibo. 1 ka X-ray machine nga analog ug 1 ka ultra-sound machine nga anaa sa P10milyones ang kantidad. Hinuon, ang usa ka X-ray machine nga dili depektibo, digital ang model niini, apan magamit sa tradisyonal nga pamaagi diin pagagamitan kini ug film tungod kay kinahanglan pang mupalit sa gitawag nga DR system nga nagakantidad sa kapin kun kulang P1,000,000.00. Ang Mechanical Ventilators gidesisyonan nga dili una abrehan tungod kay matud pa sa supplier, kinahanglan silang mubiyahe sa alas 2 ang takna pagkahapon, ug dili mumenos sa 3 ka oras ang gikinahanglan arun maset-up ang maong ventilators. Apan matud pa nga mubalik sila dinhi sa lungsod aron sa pagpahigayon sa inspeksiyon niini.

Gibutyag usab sa supplier nga duha ka tuig lamang ang warranty period sa maong mga ekwipo gikan sa panahon nga gideliver kini, ug tungod kay miabot na ug lima ka tuig, dili na nila mahimong i-replace ang mga ekwipo nga possibleng depektibo na. Ang remedyo nalang matud pa mao ang pag repair niini. Ug kun ugaling dili na kini maayo pa, wala na silay mahimo niini.

Ang pagpahigayon sa inspeksiyon gisaksihan sa mga representante sa lokal nga panggamhanan sa lungsod sa Ipil partikular sa Municipal Health Officer nga si Dr. Adnilre D. Verzon ug mga kaubanan niini, ug anaa usab ang presensiya sa representante sa Dr George Tocao Hofer Medical Center (DGTHMC) diin nagpadala kini ug usa ka Radiologic Technologist (RadTech) aron makatabang sa pagsuta kung anaa ba sa insaktong kondisyon ang mga ekwipo. Anaa usab ang presensiya sa mga lokal media.

Nasayaran nga ang pondong P30 Milyones ka pesos gikan sa Department of Health gidownload sa LGU-Ipil niadtong tuig 2021 diin gigamit kini sa pagpamalit sa nahisgutan nga mga medical equipment. Nahitabo ang delivery sa bulan sa Marso apan matud pa sa supplier, wala nila gipahigayon ang pag inspeksiyon sa maong mga gamit.

Gibutyag usab ni Dra. Verzon nga niadtong panahona, wala sab gipahigayon ang turn-over ngadto sa ilang buhatan tungod kay wala pay lugar alang niini tungod sa rason nga wala pa sila nakabalhin sa building diin anaa sila nahimutang karun, hinungdan nga wala sab nila kini nagamit, ug gani sa pagpahigayon sa inspeksiyon kagahapong adlawa, gibutyag niini nga ang mga magamit lamang sa Rural Health Unit mao ang Ultra-sound, X-ray Machine ug ang Blood Bag Tube Sealer. Ang ubang mga ekwipo nga anaa sa lista, dili magamit sa RHU sa lungsod sa Ipil.

Gidugang pamahayag ni Dra. Verzon nga kun mahiluna na ang tanan, ipahigayon pa ang pormal nga pagturn-over sa mga ekwipo nga magamit sa RHU ngadto sa ilang buhatan. Nianang tungura pa nila mahimong gamiton ang maong mga medical equipment.