Gov. Ann Hofer, All Out Support sa Paglunsad sa Moral Recovery Program sa Lalawigan

Daphne Santuyo

IPIL, ZAMBOANGA SIBUGAY – Usa si Gov. Ann K Hofer sa mga unang mipirma sa Moral Recovery Program (MRP) Covenant atol sa gipahigayon nga launching ceremony sa MRP sa lalawigan sa Zamboanga Sibugay kagahapong adlawa.

Gihimo ang launching ceremony sa Atrium sa Provincial Capitol diin gitambungan kini sa mga lideres sa mga nagkadaiyang relahiyon ug denominasyon sa Zamboanga Sibugay.

Pinasikad sa usa ka SP Resolution nga gi-author ni Board Member Judge Glenn Sabijon ug gico-author ni Board Member Pava Hofer, pormal nga gimugna sa Panggamhanang Probinsyal ang Moral Recovery Program sa lalawigan diin gilangkuban kin isa mga kaparian ug mga madre sa Simbahang Katoliko, mga pastor sa Alliance ug Protestant Churches sa nagkalain-lain nga denominasyon, ug sa mga imam ug ustadz sa relehiyong Islam.

Atol sab sa maong launching ceremony gipahigayon ang induction sa mga bag-ong napili nga mga opisyales ug ang induction usab sa transition team nga mao ang maglatag sa direksiyon sa maong programa.

Matud pa ni Gov. Ann Hofer, isip usa ka lider, alang kaniya, ang maayong panggobyerno dinha magsugod sa maayong karakter ug ang tinuod nga kusog sa gobyerno dihna manukad sa integridad sa mga nanilbihan.

Gidugang butyag sa gobernadora nga sa iyang pagdako isip usa ka Romano Katoliko, ang iyang pagtuo maoy gagiya kaniya sa iyang pagpuyo ug sa iyang pagpangulo, apan kanunay matud pa siyang nagatuo ug kanunay niyang ginapuy-an nga ang pagtuo dili rason alang sa pagbulag-bulag.

Gipamahayg usab sa gobernadora nga natunong gayud ang maong kalihukan tungod kay kasamtangan nang ginatukod ang lain na usab nga mahinungdanong lakang o milestone sa lalawigan ubos sa iyang liderato. Mao kini ang pagtukod sa Interfaith Center mismo sa Capitol Complex diin ibutang ang usa ka kapilya alang sa mga Katoliko, usa ka Moske alang sa mga igsoong Muslim ug ang usa ka Prayer Center alang sa mga Christians ug mga Indigenous Peoples.

Gipangunahan usab ni Gov. Hofer ang papirma sa MRP Covenant kauban sa iyang pangandoy nga lalawigan sa Zamboanga Sibugay mahimong usa ka lalawigan nga adunay esperitohanon ug moral nga kabag-ohan.

Samtang paghuman sa maong seremonya, adunay gipahigayon nga presscon diin gibutyag ni Judge Sabijon nga tungod sa kasamtangang issue sa gobyerno nga adunay kalambigitan sa graft and corruption, angay gayud nga palig-onon ang MRP sa lalawigan sa Zamboanga Sibugay aron nga mabarogan ang usa ka pagdumala nga adunay responsibilidad ug tulubagon ngadto sa mga katawhan nga ginaserbisyohan.