IZA CALZADO UG MARICEL SORIANO, PADAYON ANG SUPPORTA SA ABS-CBN BISAN PA MAN SA MGA PAGSULAY SA 2025

Thata Manlapaz

IPIL, ZAMBOANGA SIBUGAY-Nag-atubang na usab sa usa ka dakong pagsulay ang ABS-CBN karong 2025, human mitungha ang balita nga posibleng matapos na ang partnership niini sa TV5, nga nahimong panimalay sa kadaghanan sa mga programa sa Kapamilya Network sukad sa pagsarado sa free TV operations niini niadtong 2020.

Sumala sa mga balita, giingon nga pagatapuson na sa duha ka network ang ilahang partnership tungod sa giingong kulang nga bayad sa ABS-CBN sa airtime sa TV5. Matud pa nga mikabat na sa halos ₱1 bilyon ang maong kantidad. Kung dili pa kini maresolbar sa sulod niining tuiga, posible nga tangtangon sa TV5 ang tanang programa sa ABS-CBN, lakip na ang “Batang Quiapo,” nga giilang usa sa pinakasikat ug kinaham nga serye karon sa mga Pinoy, bisan pa man sa kusog nga kompetisyon tali sa Encantadia Chronicles: Sang’gre.

Sa laing bahin, giingon usab nga nagpadayon na sa pakig-negosasyon ang kampo sa ABS-CBN sa ubang networks sama sa ALLTV2, ug posible nga pipila sa ilahang mga programa, lakip ang Batang Quiapo, ang maere sa GTV. Ang GTV usa usab sa mga network nga giingong gi-duolan sa Kapamilya Network aron mapadayon ang pagpakita sa ilahang mga programa sa telebisyon.

Bisan pa sa tanang hagit, klaro nga daghan gihapon ang nagasuporta sa ABS-CBN. Usa na niini si Iza Calzado, nga hayag ug walay pagduha-duhang nagpakita sa iyahang suporta sukad pa sa pagkawala sa prangkisa sa network. Matud pa ni Iza, “Kapit na kapit ako sa laban ng ABS-CBN, kahit wala akong kontrata, wala akong show. I want to show up, especially when it matters.” Nagpakita kini sa iyang lig-on nga baruganan ug pagkamatinud-anon sa network nga dako ang nahimo sa iyahang karera.

Padayon usab ang pagka-loyal sa Diamond Star nga si Maricel Soriano sa Kapamilya Network.Kahinumduman nga sa iyahang pagbalik sa ere sa ulahing bahin sa dekada ’80, usa ang ABS-CBN sa mga misuporta kaniya. Dinhi usab gihimo ni Maricel ang usa sa pinakataas ug pinakasikat nga drama anthology sa kasaysayan sa Philippine television, ang “The Maricel Drama Specials,” nga milungtad ug napulo ka tuig. Bisan pa sa iyahang temporaryong pagbiya sa network niadtong 2012 tungod sa mga isyu ug panagbangi, mibalik gihapon siya ug gipili nga magpabilin sa ABS-CBN. Apil usab si Maricel sa unang mga artista nga midawat ug serye sa Kapamilya Network human kini gipasirado sa panahon sa administrasyon ni Duterte niadtong nakalabay’ng mga tuig.

Sa karon, samtang nagpadayon ang mga negosasyon ug diskusyon, naglaum ang daghang Kapamilya fans nga makakita ug tin-aw ug ug makab-ot ang maayong solusyon aron magpadayon ang mga programa sa ABS-CBN ug mapadayon ang serbisyo niini sa katawhan, uban ang suporta sa mga artista nga nagtuo ug mitindog alang sa network taliwala sa kalisod.