50 KA MGA KABATAAN NAKABENEPISYO SA DOLE "PAMASKONG HANDOG 2025" SA IPIL

Thata Manlapaz

IPIL, ZAMBOANGA SIBUGAY- Mipahigayon ug Pamaskong Handog 2025 Project: Angel Tree ang Department of Labor and Employment (DOLE) sa lungsod sa Ipil niadtong Disyembre 15 2025 ala-1 ang takna sa kahapunon sa mini-podium sa Government Center sa Taway, Ipil, Zamboanga Sibugay, nga adunay tumong nga maghatag ug kalipay ug tabang sa mga kabataan ilabi na karong panahon sa Pasko.

50 ka mga bata ang napili isip beneficiaries sa maong programa. Sumala pa sa taho nga ang DOLE mismo ang naghimo sa profiling sa mga beneficiaries aron masiguro nga ang mga tabang mahatag sa tinuod nga nanginahanglan. Ang mga napiling kabataan nakadawat ug Christmas gift packs nga gilangkuban sa grocery items, personal hygiene kits, ug bugas. Dugang pa niini, nakadawat usab ug cash gifts ang mga batang beneficiaries aron adunay gamiton sa ilang personal nga panginahanglan o sa pagsaulog sa Pasko.

Ang kalihukan gitambungan sa mga opisyales sa DOLE ug lokal nga panggamhanan sa Ipil. Human sa opisyal nga programa, mas midugang pa ang kasadya sa mga bata tungod kay nagpa-ice cream ang Ipil Mayor nga si Ramses Troy “Rambo” D. Olegario, ug aduna usab free rides sa Ipil Christmas Carnival nga gipahimuslan sa mga kabataan.

Klaro nga nakita ang kalipay ug pahiyom sa mga bata samtang naglingaw-lingaw sila human sa programa. Matud pa sa impormasyon, ang gift packs ug cash gifts nga gihatag sa mga bata usa ka inisiyatibo gikan sa personal nga pondo ni Mayor Olegario, inubanan sa tabang sa mga sponsors gikan sa mga opisyales ug private entities. Kini nagpakita sa dako nga suporta sa lokal nga panggamhanan ug pribadong sektor alang sa kaayuhan sa mga kabataan sa Ipil. Pinaagi sa maong kalihukan, gipakita sa DOLE ug sa lokal nga panggamhanan sa Ipil ang ilahang pagtagad ug kasingkasing sa kaayuhan sa kabataan, ilabi na karong panahon sa Pasko.

Ang Pamaskong Handog 2025 dili lamang paghatag ug materyal nga tabang, kundili usa usab ka paagi sa paghatag ug paglaum, kalipay, ug pagbati nga dili sila biyaan sa gobyerno ug komunidad.