SMJSI ug MSS, MAGSANGKA SA 4TH RAMBO CUP CHAMPIONSHIP

Thata Manlapaz

IPIL, ZAMBOANGA SIBUGAY- Human sa daghang adlaw sa intense nga duwa, walay hunong nga pagtulo sa singot ug dakong paningkamot sa tanang mingsalmot, duha na lang ka eskwelahan ang nakasulod sa pinakamahinungdanong duwa sa 4th Rambo Cup Championship. Kini mao ang Sibugay’s Matthew-Jackson School Inc. (SMJSI) ug Marcelo Spinola School (MSS) - duha ka teams nga nagpakita sa ilahang disiplina, panaghiusa, ug determinasyon sa matag game.

Sa ilahang pag-abot sa finals, napamatud-an sa duha ka tulunghaan nga dili lang talento ang ilahang dala kundili dala usab nila ang teamwork ug tinuod nga garbo sa ilang matag tulunghaan. Matag pasa, matag depensa, ug matag puntos nagpakita sa ilahang seryosong pagpangandam alang sa championship game.

Ang 4th Rambo Cup dili lamang mahitungod sa pag-angkon sa tropeyo. Kini usa ka torneyo nga nagapakita sa garbo sa eskwelahan, kalampusan sa team, ug panaghiusa sa komunidad pinaagi sa sports. Bisan pa ug usa ra ka team ang mahimong kampeon, ang SMJSI ug MSS pareho nang nagbilin ug dakong marka sa maong torneyo.

Samtang naghulat ang tanan sa grand finals, gina-anticipate usab ang aksyon alang sa 3rd place match tali sa Sibugay Technical Institute Inc. (STII) ug Ipil National High School (INHS). Bisan wala sila nakaabot sa finals, ang ilahang gipakitang paningkamot, kaisog, ug sportsmanship angay kaayo pasalamatan ug palakpakan.

Ginaimbitar ang tanang estudyante, ginikanan, ug sports fans nga ipakita ang tibuok suporta sa ilahang eskwelahan. I-shagit ang school pride ug i-cheer ang paboritong team karung gabii, Enero 26, 2025, alas 6:00 sa gabii, sa Ipil Green Court.