INSIDENTE SA PAGPAMUSIL NATALA SA LUNGSOD SA IPIL; USA PATAY, USA ANGOL

Thata Manlapaz

IPIL, Zamboanga Sibugay - Usa ka insidente sa pagpamusil ang nahitabo bandang alas 8:00 sa gabii niadtong Enero 27, 2026, sa Purok Caimito, Barangay Sanito, lungsod sa Ipil, nga miresulta sa kamatayon sa usa ka batan-ong mekaniko ug sa pagka-angol sa usa pa ka lalaki. Sumala sa report sa Ipil Municipal Police Station (MPS), nadawat sa kapulisan ang tawag mahitungod sa maong pagpamusil ug dayon silang miresponde aron sa pagberipikar sa impormasyon ug pagsugod sa imbestigasyon. Sa ilang pag-abot sa lugar, ilang nakaplagan ang duha ka lalaking biktima nga naghigda sa yuta ug adunay mga samad pinusilan. Ang unang biktima giila sa mga nakasaksi nga si Ryan Tan, 43 anyos, minyo, tag-iya sa usa ka motor shop, ug residente sa Top Mars 2, Barangay Veterans Village, Ipil. Samtang ang ikaduhang biktima mao ang 22 anyos nga giilang si Amer Pandusan nga usa ka mekaniko ug residente sa Purok Simangal, Barangay Magdaup, Ipil.

Base sa inisyal nga imbestigasyon, nag-ayo pa ug motorsiklo ang duha ka biktima sulod sa ilang motor shop dihang kalit lang nga miduol ang suspek ug walay klarong hinungdan nga mipusil kanila. Ang 22 anyos nga biktima naigo sa dughan, samtang ang 43 anyos nakaangkon ug tulo ka igo sa bala sa iyang paa.

Gilayon nga gi-rescue ang duha ka biktima ug gidala sa Dr. George T. Hofer Medical Center, apan gideklarar nga dead on arrival si Pandusan. Ang laing biktima padayon nga ginatambalan ug karon anaa sa stable nga kahimtangan.

Human sa insidente, paspas nga nakaikyas ang suspek padulong sa direksyon sa Pagadian City, sakay sa usa ka itom nga Mio i125 nga motorsiklo nga walay plaka. Miabot usab sa lugar ang Scene of the Crime Operatives (SOCO) aron sa pagproseso sa crime scene, diin narekober ang duha ka deformed nga slug ug pito ka basiyo sa bala nga caliber .45, nga giisip nga ebidensya. Sa pagkakaron, padayon pa ang imbestigasyon sa kapulisan aron mahibal-an ang motibo sa krimen. Nagpadayon usab ang hot pursuit ug follow-up operations sa Ipil MPS aron madakpan ang suspek ug mapatubag sa balaod ang responsable sa maong krimen. Gibutyag sa kapulisan nga magpadayon sila sa ilang paningkamot aron masiguro ang kaluwasan sa katawhan ug mapalig-on ang kalinaw ug kahapsay sa lungsod sa Ipil.