IPIL MAYOR RAMBO OLEGARIO HINGPIT NGA GIPATUMAN ANG ANTI-RED TAPE POLICY

Daphne Santuyo

IPIL, ZAMBOANGA SIBUGAY - Hingpit nga gipatuman ni Ipil Municipal Mayor Hon. Ramses Troy “Rambo” D. Olegario ngadto sa tanang empleyado sa Lokal nga Panggamhanan sa lungsod sa Ipil ang usa ka kamanduan nga naglatid sa klarong pagdumili sa pag-apil sa bisan unsang pamaagi sa pagproseso sa mga dokumento sa gobyerno alang sa personal o pribadong interes. ADVERTISEMENT

Ang Memorandum No. 2025-09-008 nga gipagawas kaniadtong Setyembre 4, 2025 naglatid sa mosunod nga punto:

1. PROHIBITION (Pagdumili) Dili na tugutan ang tanang empleyado sa LGU-Ipil, regular, job order o contract of service, nga direkta o dili direkta nga moproseso, mo-transact, o motabang sa pagkuha sa mga Business Permits, Licenses, Clearances, Certifications, Vital Records ug uban pang dokumento sa gobyerno alang sa pribadong individwal, entity o organisasyon.

2. SCOPE (Sakop sa Pagdumili) Ang pagdumili sa maong ginbuhaton dili lang limitado sa pagproseso. Lakip usab niini ang pagdawat, pag-endorso, pag-follow-up, pag-fast track, o pag-apil sa bisan unsang lakang nga may kalabutan sa transaksiyon sulod sa tanang departamento ug opisina sa LGU-Ipil.

3. ACCOUNTABILITY (Tulubagon) Gipahimangnuan usab nga ang tanang musupak niining maong mando mahimong kasuhan ug “administrative o disciplinary action” base sa kasamtangang balaod ug regulasyon. Kining lakang kabahin sa pagpaningkamot sa LGU-Ipil nga mapatuman ang integridad, “transparency ug professionalism” sa pagserbisyo publiko, aron malikayan ang bisan unsang porma sa “favoritism”, palusot o “under-the-table transactions”.

Sa iyang mensahe, gipasiugda ni Mayor Olegario ang direktiba isip timaan sa seryoso nga pagpatuman sa limpyo ug patas nga serbisyo publiko, ug ginalauman niini ang hingpit nga kooperasyon ug pagtuman sa tanang empleyado alang sa kaayuhan sa lungsod sa Ipil.