Photo credit to Anne Jakrajutatip FB Page
KANHING MISS UNIVERSE CEO, GUILTY SA FRAUD CASE SA THAILAND
IPIL, ZAMBOANGA SIBUGAY– Gihukman nga guilty sa korte sa nasud sa Thailand ang kanhing Miss Universe CEO nga si Anne Jakrajutatip tungod sa kasong fraud o pagpanikas kalabot sa 30 milyong Baht o kapin kun kulang P56.7 milyon pesos nga corporate bond investment.
Sumala pa sa taho, posibleng masentensyahan si Jakrajutatip ug kapin duha ka tuig nga pagkabilanggo human napamatud-an nga nalapas niya ang balaod kabahin sa pinansyal nga transaksiyon. Ang desisyon gipagawas sa Bangkok South Kwaeng Court.
Gipadayag sa korte nga usa sa mga hinungdan sa iyahang kaso mao ang wala niya pagtungha sa mga hearing sa korte, ilabi na sa verdict hearing niadtong Nobyembre 25.
ADVERTISEMENT
Tungod niini, nagpagawas ang South Bangkok Criminal Court ug kamanduan sa pag-aresto ngadto kaniya.
Niadtong Disyembre 26, mitambong sa hearing ang representante sa JKN Global Group, ang kompanyang gipangulohan ni Jakrajutatip. Apan wala gihapon siya personal nga miatubang sa korte, mao nga gihukman ug “in absentia”, o paghukom bisan wala ang akusado.
Si Anne Jakrajutatip nailhan sa tibuok kalibutan isip lider sa JKN Global Group ug isip kanhing CEO sa Miss Universe Organization, maong init ang isyu sa publiko.
Sa pikas bahin, padayon pa ang monitoring sa mga awtoridad mahitungod sa kahimtang sa kaso, lakip na ang posibilidad sa iyahang pag-aresto ug pagpatuman sa sentensya.
