IPIL SB, TOP 2 SA LOCAL LEGISLATIVE AWARD SA TIBUOK REHIYON

Thata Manlapaz

Ipil, Zamboanga Sibugay - Nakab-ot sa Sangguniang Bayan (SB) sa Lungsod sa Ipil ang Top 2 sa Local Legislative Award (LLA) ilawom sa 1st to 3rd class municipality category sa bag-ohay lang nga Philippine Councilors’ League (PCL) National Convention nga gipahigayon sa J Park Island Resort, Lapu-Lapu City, niadtong Disyembre 1–3, 2025.

Ang maong pag-ila usa ka dakong dungog alang sa SB-Ipil, nga nagpamatuod sa ilang lig-on, organisado, ug episyenteng pagserbisyo sa lokal nga lehislatura. Giila ang Sangguniang Bayan tungod sa ilang han-ay, klaro, ug epektibong ordinansa nga nakatabang sa pagpalambo sa lungsod, ekonomiya, ug mga programa alang katawhan.

Ang SB-Ipil napasidunggan isip regional finalist sa Region IX, ug napili isip Rank 2 sa tibuok rehiyon, usa ka timaan nga padayon ang kadaugan sa Ipil sa natad sa maayo nga pagdumala ug epektibong pagpapatuman sa mga palisiya.

Ang award gidawat nila ni Konsehal Jong Alcoriza, Konsehal Toto Alibutdan, Konsehal Elias Dangpalan, ug Konsehal Dianne Cataluña. Gilauman usab ang presensya ni Vice Mayor Anamel Olegario, apan wala kini nakatambong sa maong awarding ceremony.

Matud pa sa SB-Ipil, kini nga pasidungog magadasig kanila nga mas mopadayon sa paghatag ug malampuson nga serbisyo sa sulod sa ilang termino. Gilauman nga ang ilang paningkamot ug aksyon karon mao’y magdala sa Ipil ngadto sa championship award sa umaabot pa nga Local Legislative Award sa sunod nga mga katuigan.

Gipasalamatan usab ang tibuok SB-team sa ilang panaghiusa, dedikasyon, ug pagkugi, lakip na sila:

Konsehal Shariff Mazin Hasim, Konsehal Trixie Mil Torralba Palalon, Konsehal Janelle F. Bordner, Konsehal Joel Ebol, Konsehal Alhapid Mohammad, Vice Mayor Anamel Inday Amy Olegario, ABC President Roy Olegario, ug Konsehal Ian Sabijon.

Kini nga award usa ka dakong inspirasyon alang sa katawhan sa Ipil ug timailhan nga padayon nga nagbarug ang lungsod sa maayong pagserbisyo ug lig-on nga lokal nga panggamhanan.