JUNREEN DE SIBUGAY SPIKERS UG JUNREEN BASILAN SPIKERS BRAVO TEAM NAGPAHIGAYON SA TUNE-UP GAME DINHI SA PROBINSIYA

Thata Manlapaz

IPIL, ZAMBOANGA SIBUGAY- Nagmalampuson ang unang pagbisita sa Basilan Volleyball Team ubos sa pagdumala ni Coach/Manager Rodrigo Celebrado Jr., tag-iya sa JunReen Basilan Spikers, dinhi sa lalawigan sa Zamboanga Sibugay aron sa pagpahigayon ug duha ka adlaw nga tune-up games kauban ang mga volleyball clubs sa probinsya.

Ang nahisgutang kalihukan gisuportahan sa LAMBO PA Sibugay Volleyball Club nga nagdala sa mas lapad nga sports engagement sa komunidad. Sa unang adlaw pa lamang, init na ang nahimong dula sa Capitol Gym. Nag-atbang usab ang Basilan team batok sa daghang homegrown teams sa lalawigan diin lakip niini ang LPS Rookies, LPS Legends, BBS–Naga, JunReen Basilan Spikers, JunReen de Sibugay Spikers, Amigos Team (headed by Jay Bawisan), Gango NHS (headed by Luz Dafz), IMA–Ipil Shepherd Montessori School, ug Taway National Highschool.

Sulod sa unang adlaw, gipahigayon ang dako nga highlight tune-up match sa JunReen Basilan Spikers Bravo batok sa JunReen de Sibugay Spikers. Ang maong duwa gipahigayon aron nga ma-develop ang individual skills sa mga players, mapalig-on ang teamwork, ug mapaayo ang court chemistry sa duha ka grupo.

Si Coach Rodrigo Celebrado Jr. mipadayag nga ang ilahang pagbisita usa ka mahinungdanon nga lakang sa pagpangandam alang sa umaabot nilang kompetisyon. “Kini nga tune-up games maghatag ug dakong tabang sa paghulma sa performance sa mga players ug sa pagkugi sa ilang team cohesion,” matud niya. Nagpasalamat usab ang organisasyon ilabina ngadto kay Muse Toneth, nga nagpakita ug dakong suporta ug panahon aron masiguro ang kalampusan sa kalihukan.

Gibati sa tanang dumuduong nga mga teams' ang mainitong pagdawat sa Zamboanga Sibugay volleyball community.

Sa ikaduhang adlaw, padayon ang kadasig sa nasangpit nga panagtagbo ingon man ang ilahang pagbisita. Nagpahigayon ug dugang nga tune-up games ang Basilan ug Sibugay teams diin kaatbang niini ang Cainglet Volleyball Club ug St. Miguel Kabasalan Volleyball Team. Ang duha ka adlaw nga kalihukan nagpamatuod sa kusog nga suporta ngadto sa isports nga volleyball sa Zamboanga Peninsula. Ang inter-province friendly games nag-abli ug oportunidad sa mga players nga mas mapalambo ang ilahang abilidad samtang nagpauswag ug relasyon tali sa Basilan ug Zamboanga Sibugay sports communities. "Together we rise. Together we strike". Mao kini ang official nga Volleyball Tagline sa JUNREEN SPIKERS VOLLEYBALL CLUB.