PBBM, GIDAYEG UG GIPASALAMATAN ANG LA SALLE HUMAN NGA NAGCHAMPION SA UAAP MEN'S BASKETBALL

Thata Manlapaz

IPIL, ZAMBOANGA SIBUGAY- Gidayeg ug gipasalamatan ni Presidente Ferdinand Marcos Jr. ang iyahang alma mater nga De La Salle University (DLSU) human nga nakab-ot sa Green Archers ang UAAP Men’s Basketball Championship. Matud sa Presidente, talagsaon ug makalingaw kaayo ang finals series tali sa La Salle ug sa University of the Philippines (UP).

Sa iyahang post sa social media, gibutyag ni Marcos nga usa kini ka “classic” nga finals ug klaro nga parehas nga lig-on ug andam ang duha ka teams. “A great UAAP basketball finals series between UP and La Salle. Well played to all! Congratulations to the UAAP Basketball Champions, the De La Salle Green Archers! A well-deserved championship for a great team,” matud pa sa Presidente.

Gidugang pa ni Marcos nga ang kadaugan sa La Salle tinud-anay nga angay lang, tungod sa paningkamot, disiplina, ug panaghiusa sa tibuok team. Gitapos niya ang iyahang mensahe gamit ang rallying cry sa La Salle, nga nagpaila sa iyang padayon nga suporta ug garbo isip alumni.

Si Presidente Marcos mingtungha sa La Salle Greenhills sa iyahang elementary niadtong 1964, busa espesyal alang kaniya ang kalampusan sa nasampit nga tulunghaan. Sa maong dula, nabawi sa La Salle ang kapildihan nila sa UP sa miaging tuig pinaagi sa usa ka dili malimtan nga 80-72 nga daug sa Game Three niadtong Miyerkules sa gabii. Gipuno sa hugyaw nga suporta gikan sa mga fans ang Smart Araneta Coliseum, hinungdan sa dakong kadasig sa mga players.

Tungod niining kadaugan, napamatud-an sa La Salle nga mingbalik na usab sila isip hari sa UAAP men’s basketball, ug gipalipay usab nila ang ilahang mga alumni, estudyante, ug mga supporters sa tibuok nasud.