HB 8471 APRUBADO NA SA IKADUHANG PAGBASA; GILAUMANG MATUKOD ANG UNANG DOH-RUN HOSPITAL SA ZAMBOANGA SIBUGAY

Thata Manlapaz

IPIL, Zamboanga Sibugay — Usa ka mahinungdanong lakang alang sa sektor sa panlawas sa probinsya sa Zamboanga Sibugay ang pag-aprubar sa ikaduhang pagbasa sa House Bill No. 8471 sa Kongreso.

Ang maong balaodnon nagtumong sa pagtukod sa Zamboanga Sibugay Medical Center, nga giplanong mahimong Level III General Hospital. Kung mapasar kini sa katapusang pagbasa ug mapirmahan isip balaod, kini ang mahimong unang ospital sa probinsya nga direktang pagadumalaan sa Department of Health (DOH).

Sumala pa sa Kongresiyunal nga Buhatan sa Segundo Distrito ning Lalawigan sa Zamboanga Sibugay, ang Level III nga ospital makahatag ug mas daghang klase sa serbisyo medikal, lakip na ang advanced nga operasyon, presensya sa mga espesyalistang doktor, ug mas kompleto nga pasilidad alang sa pagtambal sa mga pasyente.

Kung matuman ang proyekto, dako kini nga tabang sa mga Sibugaynon nga nanginahanglan ug taas nga lebel sa pag-atiman sa panlawas. Sa pagkakaron, daghang pasyente gikan sa probinsya ang mapugos pa nga mobiyahe padulong sa ubang syudad o probinsya aron makadawat ug mas komplikado nga serbisyong medikal.

Ang maong balaudnon gipaluyohan ni Marly Hofer Hasim, representante sa Ikaduhang Distrito sa Zamboanga Sibugay. Sumala sa iyahang opisyal nga FB Page, ang pag-apruba sa ikaduhang pagbasa usa ka dakong progreso sa pagduso sa pagtukod sa maong ospital.

Bisan pa sa kalampusan sa ikaduhang pagbasa, adunay mga proseso pa nga agian sa Kongreso sa dili pa kini mahimong hingpit nga balaod. Kinahanglan pa kini mapasar sa ikatulong pagbasa ug sa ubang pamaagi sa lehislatura.

Kung mahimong balaod ang HB 8471, gilauman nga mas mapalapdan ang serbisyo sa panlawas sa probinsya ug mas mapadali ang pag-access sa kalidad nga serbisyong medikal sa mga residente sa Zamboanga Sibugay.

Sa usa ka pahayag, gibutyag sa Kongresista nga padayon ang paningkamot aron matuman ang maong proyekto, nga gihulagway niya nga usa ka dakong kaayuhan alang sa katawhang Sibugaynon.