PANGGAMHANANG PROBINSIYAL SA BATANGAS, NAGPAGAWAS SA OPISYAL NGA PAMAHAYAG KABAHIN SA VIRAL POST

Thata Manlapaz

IPIL, ZAMBOANGA SIBUGAY- Nagpagawas ug opisyal nga pahayag ang Panggamhanang Probinsiyal sa Batangas aron klaruhon ang nag-viral nga mga post sa social media kabahin sa usa ka press interview ni Gobernadora Vilma Santos-Recto. Sumala sa provincial government, sayop ug wala sa hustong konteksto ang mga nagkatag nga impormasyon nga nagpasangil nga negatibong nanghusga kuno ang gobernador sa publiko.

Matud pa sa pahayag, piniling bahin ra sa tibuok interview ang gikuha, giputol, ug gi-edit, nga maoy hinungdan nga nasayop ang pagsabot sa mensahe sa gobernador. Tungod niini, naporma ang sayop nga naratibo ug akusasyon nga dili gyud tinuod base sa tibuok niyang gipamahayag.

Gipasabot sa Panggamhanang Probinsiyal nga ang tinuod nga gipasabot ni Gov. Santos-Recto sa maong interview mao ang nagkagrabeng problema sa misinformation, ilabi na ang pagkatag sa fake news ug manipuladong mga content sa online platforms. Ang tumong sa iyahang mensahe mao ang pagpahimangno sa katawhan nga magmatngon ug magbinantayon sa tanang impormasyong ilahang makita sa social media.

Dugang pa, gihatagan ug gibug-aton sa pamahayag nga wala gayud gituyo sa gobernador nga sawayon ang ordinaryong mga katawhan. Ang iyahang gipasabot mao ang dakong kadaot sa tinuyo nga pagpakatag ug sayop nga impormasyon, nga mahimong muresulta sa kalibog, kasamok, ug pagkabahin-bahin sa mga katawhan.

Sa katapusan, minghangyo ug gihagit sa Provincial Government sa Batangas ang tanang katawhan nga mamahimong responsable sa paggamit sa social media. Ilahang gipahinumduman ang tanan nga sutaon una ang impormasyon sa kasaligan nga sources sa dili pa kini ibutyag ngadto sa publiko, ug mokooperar sa makahuluganon nga diskurso alang sa kaayuhan sa katilingban.