SESSION SA TULO KA SANGGUNIAN SA IPIL, NAGA UG ROSELLER LIM, NAGTUTOK SA PAGPINALISAR SA MUNICIPAL WATERS BOUNDARIES

Thata Manlapaz

IPIL, Zamboanga Sibugay — Gipundok sa hiniusang sesyon ang mga miyembro sa Sangguniang Bayan sa Ipil, Naga ug Roseller Lim aron masulbad ug mapinalisar ang mga importanteng detalyeng may kalabutan sa coastal terminal points, boundaries, ug delineation ug mapping sa municipal waters.

Gipahigayon ang maong Joint Session kagahapon, Agosto 10, 2026, alas-2:00 sa hapon sa Badsbrotel Suites, Pangi, Ipil, Zamboanga Sibugay, diin nahimong sentro sa diskusyon ang tukmang pag-ila ug pagtakda sa mga utlanan sa municipal waters sa tulo ka lungsod.

Gipangunahan ang joint session ni Ipil Vice Mayor Hon. Anamel C. Olegario, isip Presiding Officer, samtang mitabang sa pagdumala sa diskusyon si SB Member Hon. Alberto A. Alcoriza, isip Floor Leader. Mitambong usab ang mga miyembro sa tulo ka Sangguniang Bayan alang sa hiniusang paghisgot sa mga isyu ug kinahanglanon may kalabutan sa coastal boundaries.

Usa sa mahinungdanong punto sa panagtigom mao ang pagpinalisar sa coastal terminal points ug utlanan sa Ipil, Naga ug Roseller Lim. Ang maong proseso importante aron masiguro nga klaro ug insakto ang pagtakda sa mga utlanan sa municipal waters sa matag munisipyo.

Gihisgutan usab ang awtoridad sa tulo ka mga Mayor sa pagpirma sa mga mapa ug uban pang gikinahanglang dokumento nga isumiter ngadto sa National Mapping and Resource Information Authority (NAMRIA) isip kabahin sa proseso sa delineation ug mapping.

Gikahiusahan sa joint session nga kinahanglan ang lig-on nga koordinasyon tali sa nagkadaiyang municipal offices aron masiguro nga kompleto ug husto ang mga dokumento. Lakip sa mga opisina nga adunay importanteng papel niini mao ang Municipal Planning and Development Coordinator (MPDC), Municipal Agriculture Office (MAO), ug Municipal Environment and Natural Resources Office (MENRO) sa matag munisipyo.

Pinaagi sa hiniusang pagtrabaho sa maong mga buhatan, gilauman nga mas hapsay ang pagkompleto sa mga documentary requirements ug ang pagproseso sa mga dokumento alang sa pagsumite ug koordinasyon sa NAMRIA ug uban pang concerned agencies.

Dili lamang administratibo o dokumentaryong butang ang pagtakda sa municipal waters. Importante usab kini sa pagdumala, pagpanalipod ug hustong paggamit sa mga kahinguhaan sa katubigan nga sakop sa matag munisipyo. Ang klarong delineation makatabang sa lokal nga panggamhanan sa pagpatuman sa mga polisiya ug programa alang sa pagpanalipod sa kadagatan ug coastal resources.

Ang hiniusang paghisgot sa tulo ka Sangguniang Bayan nagpakita usab sa panginahanglan sa kooperasyon tali sa mga lokal nga panggamhanan, ilabi na tungod kay adunay mga coastal areas ug boundaries nga nagkadugtong ug nagkinahanglan og tukmang koordinasyon.

Sa kinatibuk-an, ang Joint Session nahimong usa ka mahinungdanong lakang sa pagpalig-on sa koordinasyon sa Ipil, Naga ug Roseller Lim alang sa mas klaro ug dokumentadong pagtakda sa ilang coastal terminal points ug municipal waters.

Gilauman nga pinaagi sa pagkompleto sa mga kinahanglanong dokumento, mapa ug proseso uban sa mga concerned offices ug national government agencies, mas mapalig-on ang pagdumala sa municipal waters ug ang pagpanalipod sa mga kahinguhaan sa kadagatan alang sa kaayuhan sa mga komunidad sa tulo ka munisipyo.