ALESON SHIPPING LINES NAGPAGAWAS SA OPISYAL NGA PAMAHAYAG MAHITUNGOD SA NALUNOD NGA BARKO SA BASILAN

Thata Manlapaz

IPIL, ZAMBOANGA SIBUGAY — Opisyal nga nagpagawas sa pamahayag ang Aleson Shipping Lines, Inc. mahitungod sa nalunod nga pampasaherong barko nga M/V Trisha Kerstin 3 sa kadagatan dapit sa Baluk-Baluk Island, Basilan sa kadlawon ning adlawa, Lunes, Enero 26, 2026.

Sumala pa sa kompanya, sa dihang ilahang nadawat ang distress call gikan sa barko, diha-diha dayon nilang gi-activate ang quick response measures ug gipadala ang tanang available nga mga sakayan sa maong lugar aron sa pagtabang.

Padayon usab ang ilahang koordinasyon sa Philippine Coast Guard ug uban pang may kalabutan nga ahensya sa gobyerno alang sa search and rescue operations nga nagpadayon hangtod karong tungura.

Nagpaabot ang Aleson Shipping Lines sa gibating kasubo sa nahitabong trahedya ug ilahang gipadayag ang kaluoy ug pakig-uban sa kasakit sa tanang pasahero ug crew nga sakay sa barko, lakip na ang ilahang mga pamilya nga anaa sa pagbangutan.

Nagpasalamat usab ang kompanya kang Basilan Governor Mujiv Hataman, Isabela City Mayor Arsina Kahing-Nannoh ug sa tanang local government units ug ahensya nga walay pagduha-duha nga mitabang ug naghatag sa ilahang kusog ug kahibalo sa dihang gikinahanglan kini pag-ayo. Sa katapusan, mapahiubsanon nga nangayo ang Aleson Shipping Lines ug mga pag-ampo, pasensya, ug pagsabot sa publiko samtang nagpadayon pa ang mga operasyon ug imbestigasyon kalabot sa insidente.

Gipasalig usab sa kompanya nga maghatag sila dayon ug update sa publiko sa dihang aduna na’y beripikado ug klarong impormasyon. Padayon ang panawagan sa awtoridad sa publiko nga magpabiling kalmado ug maghulat sa opisyal nga balita samtang gihimo ang tanang paagi aron matabangan ang mga naapektuhan sa maong trahedya.