LGU IPIL UG DOH-IX, NAGKAHIUSA ALANG SA LIGTAS TIGDAS SUPPLEMENTAL IMMUNIZATION ACTIVITY (SIA

Thata Manlapaz

IPIL, ZAMBOANGA SIBUGAY- Niadtong adlaw’ng Lunes, Enero 19, 2026, paghuman sa flag raising ceremony sa LGU Ipil, opisyal nga gipahigayon ang LIGTAS TIGDAS SUPPLEMENTAL IMMUNIZATION ACTIVITY (SIA) sa Ipil Government Center, Taway, Ipil, Zamboanga Sibugay. Kini usa ka programa sa Department of Health (DOH) ubos sa Chikiting Ligtas Program, nga nagtinguha sa pagpanalipod sa mga bata batok sa Measles-Rubella.

Ang programa nagapunting sa mga bata gaedad ug 6 hangtod 59 ka bulan, aron masiguro nga sila adunay lig-on nga proteksiyon batok sa tigdas ug rubella, bisan pa man ug sila kanhi nang nabakunahan.

Sumala sa DOH-IX, importante ang supplemental immunization aron malikayan ang pagsaka sa kaso sa maong sakit sa komunidad. Atol sa seremonya, gipadayag ni Ipil SB Member Dianne Cataluña, Chairman sa Health Committee, nga misaka ang kaso sa Measles-Rubella sa miaging tuig, mao nga gipasiugda sa DOH ang pagpatuman sa maong programa nga molungtad hangtod Pebrero 13, 2026 sa tibuok Rehiyon 9.

Nagpadayag usab ug hugot nga suporta si Ipil Mayor Ramses “Rambo” D. Olegario, nga nagpasalig sa pakigtimbayayong sa lokal nga panggamhanan aron magmalampuson ang programa tungod kay ang kahimsog sa mga bata usa ka prayoridad sa iyahang administrasyon.

Atol sa aktuwal nga kalihukan, napulo (10) ka mga bata ang unang nabakunahan didto sa mini podium sa Ipil Government Center. Lakip sa mga nabakunahan ang mismong anak sa mayor, ug personal niini nga gi-administer ang Vitamin A supplementation, isip ehemplo sa iyahang pagsalig ug suporta sa programa.

Gilauman sa LGU Ipil nga motambong ug mohatag ug lig-on nga suporta ang tanang barangay sa lungsod, aron masiguro ang kaluwasan ug proteksiyon sa tanang kabataan. Gi-awhag usab ang mga ginikanan nga dad-on ang ilahang mga anak sa health centers aron makabenepisyo sa libre nga bakuna ug mapugngan ang pagsaka sa kaso sa maong sakit sa komunidad.