PINAKAUNANG CARNIVAL SA LALAWIGAN SA ZAMBOANGA SIBUGAY, GINAPANGANDAMAN NA SA LUNGSOD SA IPIL

Daphne Santuyo

IPIL, ZAMBOANGA SIBUGAY – Pila ka adlaw na lang ang ginaihap sa mga opisyales sa lungsod sa Ipil, labi na gayud sa mayor nga si Hon. Ramses Troy D. Olegario, pagasugdan na ang pinakaunang carnival sa lalawigan sa Zamboanga Sibugay nga mahimutang sa atubangan mismo sa Ipil Multi-Purpose Government Center sa Barangay Taway ning lungsod sa Ipil.

Ang Ipil Christmas Carnival nakatakdang magbukas na sa publiko karung umaabot nga Nobyembre 30, 2025 diin adunay pasundayag ang mga lokal nga banda ug ang espesyal nga performers, ang bandang Don Petok.

Sa kasamtangan, makita nga busy na sa pagpahimutang sa mga nagkalain-laing rides ug dekorasyon aron nga masigurong maabrehan sa publiko ang maong kalingawan sa gitakdang adlaw.

Matud pa ni Mayor Rambo, gibati siya ug gamay’ng kabalaka tungod sa ginasinating kadaut sa panahon sa atong dapit nga dala sa bagyo tungod kay basi ug malangan ang pagpahimutang sa mga nagkalain-laing rides, apan sa kasamtangan, paspas na ang ginahimong pagpahiluna niini. Gani, anaa na ug makita ang mga dagkong container vans nga nagdala sa maong mga rides ug karung adlawa, ginalauman ang pag-abot pa sa ubang mga vans nga magdala sa dugang pang mga gamit.

Gikalipay ni Mayor Rambo ang pagtaho nga sa pagdala niining Ipil Christmas Carnival, walay gasto ang lokal nga panggamhanan sa lungsod niini. Gani, maghatag usab kini ug dakong kahigayonan nga makabaton ug kita ang mga lokal nga negosyante tungod kay mahimo kining sentro sa pagsaulog sa pasko sa mga pamilyang Ipilenos. Nasayran nga sa palibot sa maong carnival, mahimutang usab ang mga stalls nga mamaligya ug mga pagkaon ug mga souvenir items.

Sumala pa sa mayor, sa inisyal niyang kasayuran, lakip sa mga rides nga mahutang sa maong carnival mao ang Viking ug ang 30-ft Ferris Wheel.

Gibutyag ni Mayor Rambo nga excited na sya alang niining Ipil Christmas Carnival tungod kay dako ang iyang kalipay nga makadala ug kaligangawan alang sa mga katawhan sa lungsod. Sayod ang mayor nga sa kalisud sa panahon karun, daghan ang mahikawan sa kahigayonan nga makabiyahe aron sa paglingaw-lingaw kauban ang ilang mga pamilya niining panahon sa pasko, apan pinaagi sa Ipil Christmas Carnival, ang tanan mahimong maglingaw nga dili na kinahanglan pang mugasto sa dagkong kantidad ug mubiyahe ngadto sa mga halayong dapit. Nniini giawhag sa mayor ang mga katawhan sa lungsod sa Ipil ug lakip na ang mga silingang lungsod nga dad-on ang ilang mga pamilya ug magsaulog sa pasko sa simple ug barato apan mabungahon nga paagi, tungod kay matud pa niini, “walay makatupong sa pagsaulog sa malipayong selebrasyon sa pasko nga kauban ang tibook pamilya. “