PEBRERO 17, 2026, GIDEKLARAR ISIP SPECIAL (NON-WORKING) DAY SA KABASALAN ALANG SA 89TH ARAW SA LUNGSOD

Thata Manlapaz

IPIL, ZAMBOANGA SIBUGAY- Opisyal nga gipahibalo sa Lokal nga Panggamhanan lungsod sa Kabasalan nga ang Martes, Pebrero 17, 2026, gideklarar isip Special (Non-Working) Day sa lungsod.

Ang maong deklarasyon gihimo isip pagpasidungog ug selebrasyon sa 89th Araw ng Kabasalan. Tumong sa maong deklarasyon nga hatagan ug higayon ang tanang Kabasaleños nga makiglambigit sa nagkalain-laing kalihukan nga giandam alang sa anibersaryo sa lungsod. Usa kini ka adlaw sa kalipay, panaghiusa, ug paghinumdum sa kasaysayan, diin ginasaulog ang kalambuan sa Kabasalan sukad sa iyahang pagkahimugso.

Sa maong espesyal nga adlaw, gilauman nga aduna’y mga programa, selebrasyon, ug aktibidad pangkultura nga magpakita sa adunahan nga kultura, tradisyon, ug mga nahimo sa lungsod. Gidapit ang tanang residente, mga pamilya, ug bisita nga makig-uban sa selebrasyon ug magpakita sa ilahang suporta ug garbo isip Kabasaleños.

Ang 89th Araw ng Kabasalan dili lamang selebrasyon sa edad sa lungsod, kundili usa sab ka pagpasidungog sa panaghiusa sa komunidad, sa mga lider nga nitabang sa kalambuan, ug sa tanang Kabasaleños nga padayon sa pagtinabangay alang sa mas tin-aw, mas progresibo, ug mas hayag nga kaugmaon sa lungsod.