KAINIT SA 4TH RAMBO CUP NAGPADAYON, 6 KA MGA TEAMS, NAG-ATBANGAY

Daphne Santuyo

IPIL, ZAMBOANGA SIBUGAY- Padayon ang kainit ug kasadya sa 4th Rambo Cup niadtong Enero 17, diin unom (6) ka mga teams ang midula sa court ug naghatag ug nindot nga duwa. Sa matag salang ug pasa, klaro nga gipakita sa mga magduduwa ang tinuod nga diwa sa basketball nga adunay disiplina, determinasyon, ug respeto sa dula.

Mipakita ug lig-on nga teamwork ug panaghiusa ang mga koponan nga Sibugay's Matthew Jackson School, Inc. (SMJSI), Marcelo Spinola School (MSS), ug Ipil Shepherd Montessori Center (ISMC), nga maoy hinungdan sa ilahang nahimong kadaugan sa maong adlaw.

Ang ilahang maayong koordinasyon, hustong depensa, ug maampingong opensa nagpamatuod nga andam sila sa hagit sa kompetisyon. Dili lang kadaugan ang gipunting sa Rambo Cup, apan lakip usab ang pagpalig-on sa panaghigalaay ug sportsmanship tali sa mga kabatan-unan. Ang maong torneo nahimong plataporma sa pagpalambo sa abilidad, pagkat-on sa disiplina, ug pagrespeto sa isigka-magduduwa bisan pa sa kainit sa duwa.

Sa court, makita ang suporta sa mga mingsaksi ug kauban sa eskwelahan nga nagdasig sa mga team. Nagpabiling malinawon ug organisado ang kompetisyon, nga naghatag ug positibong kahimtang alang sa tanang partisipante. Sa sunod nga adlaw sa Rambo Cup, gilauman nga mas init pa nga mga duwa ug mas daghang talagsaong aksyon ang masaksihan.