LEAN DE GUZMAN, MINGTUBAG NA SA AKUSASYON SA MATUD PANG PAGPANGILAD UG MAGPASAKA UG CYBER LIBEL BATOK KANG VINZ JIMENEZ TUNGOD SA PUBLIC SHAMING

Thata Manlapaz

IPIL, ZAMBOANGA SIBUGAY- Mingpagawas na ug pamahayag si Lean De Guzman kabahin sa kontrobersiya diin giakusahan kini ug matud pang pagpanglimbong ngadto kang Vinz Jimenez nga kasamtangang uyab niini ug sa iyang kanhing uyab. Ang maong isyu mingsamot ug kaylap sa social media ug mingresulta sa daghang reaksyon gikan sa publiko.

Sumala sa pamahayag ni Lean, napugos siya sa pagtangtang o pag-delete sa iyahang mga social media account human sa tambag sa iyahang pamilya. Kini tungod sa grabe na kaayong pangbastos, pagpangdaot sa iyahang pangalan, ug public shaming nga iyahang naagian online. Matud pa niya, dili na makatarunganon ang mga komento ug post nga nagtuyok sa social media, diin giatake na dili lang ang iyahang aksyon apan apil na usab ang iyahang pagkatawo ug dignidad.

Iyahang gipadayag nga bisan ang iyahang mga higala mitambag nga magpakahilom na lang siya aron dili na mudako pa ang kagubot ug aron ang tanan makamove-on na. Apan giangkon niya nga lisod kaayo ang pagpakahilom, labi na nga ang mga post ni Vinz nakaabot na ug milyon ang reach ug padayon pang gina-share sa lain-laing plataporma. Matud pa ni Lean, mikaylap na ang iyahang nawong ug pangalan sa nagkadaiyang social media sites, uban sa daghang memes, istorya, ug mga assumption nga gihimo sa mga tawo nga wala kuno kahibalo sa tinuod ug sakto nga panghitabo. “Murag gipatay na ko sa social media — adlaw-adlaw, balik-balik,” sumala pa niya.

Bisan pa niini, wala gitago ni Lean ang iyahang sayop ug dayag niyang giangkon ang responsibilidad sa iyahang nabuhat. “Aminado ko nga naa koy sayop. Wala nako kini ginapanghimakak ug nagbasol gyud ko,” matud niya. Apan iyahang gipadayag nga dili kini rason aron tapakan ang iyahang pagkatawo sa publiko, ilabi na pinaagi sa walay hunong nga panglibak ug pangdaot. Gisaway usab ni Lean ang sayop nga paggamit sa call-out culture, nga sumala niya, nahimong pamaagi sa uban aron mangdaot ug tawo ug himuong content ang kasakit sa uban. “Dili lisensya ang call-out culture para gub-on ang pagkatawo sa usa ka tawo ug himuong kalingawan ang iyahang pag-antos,” dugang pa sa gipadayag niini.

Tungod sa padayon nga public shaming, pagpanaway, ug pagpakaylap ug makadaot nga impormasyon, gikumpirma ni Lean nga mopasaka na siya ug cyber libel case batok kang Vinz Jimenez. Sigun pa niya, mingkonsulta na sila karon sa abogado aron ipadayun ang legal nga lakang. Gipatin-aw ni Lean nga ang iyahang desisyon dili paglikay sa accountability, kundili usa ka paagi aron panalipdan ang iyahang dignidad, mental health, ug katungod isip usa ka indibidwal. “Ang sayop naay limitasyon. Apan ang pagpangbastos ug pagpangdaot, pinili na kana sa tawo,” maoy iyahang panapos nga pahayag.

Sa kasamtangan, wala pa’y opisyal nga tubag si Vinz Jimenez kabahin sa planong pagpasaka sa kaso. Padayon pang ginatan-aw sa publiko ang sunod nga mga panghitabo sa isyung nagpasiga pag-usab sa diskusyon mahitungod sa responsableng paggamit sa social media ug ang peligro sa public shaming.