Sibugaynon Naangkon ang Gold Alang sa Pilipinas sa ASEAN PARA GAMES 2025

Thata Manlapaz

IPIL, ZAMBOANGA SIBUGAY- Dakong kalipay ug garbo ang gibati sa tanang Pilipinhon human nakab-ot ni Lhey Marie Manginsay, usa ka atletang Filipina nga taga Naga, Zamboanga Sibugay ang unang medalya nga bulawan alang sa Pilipinas sa table tennis event sa ASEAN PARA Games 2025 nga gipahigayon sa Thailand bag-ohay pa lamang.

Si Manginsay nga nailhan usab isip silver medalist sa Asian Youth Para Games, nagpakita sa iyang kusog, disiplina, ug determinasyon sa dihang iyahang gipilde ang atleta sa Indonesia nga si Dewi Tri Kurniantari Sugiharto sa usa ka mainiton ug gikahinaman nga five-set final match. Tungod sa iyahang paningkamot ug lig-on nga hunahuna, nakuha niya ang gold medal sa Women’s Singles Class 9.

Sa tibuok duwa, makita gyud ang tinuod nga diwa sa usa ka kampyon, dili lang sa iyahang abilidad sa dula, apan usab sa iyahang kaisog ug padayon nga pagpaningkamot bisan pa sa mga hagit nga iyang giatubang.

Ang iyahang kadaugan usa ka dakong inspirasyon dili lang sa mga atleta apan lakip usab sa tanang Pilipino, ilabi na sa kabatan-onan nga nagdamgo nga mahimong kampyon sa kaugalingong paagi. Ang kalampusan ni Lhey Marie Manginsay nagpakita nga ang grassroots sports development ug suporta sa para athletes makahatag ug dakong kausaban ug kadaugan sa international nga lebel. Tinuod gayud nga siya usa ka ehemplo sa tinuod nga kampyon ug usa ka garbo dili lamang alang sa Zamboanga Sibugay apan sa tibuok nasud..