IPIL NAGSAULOG SA KUSOG SA KABABAYEN-AN: WOMEN’S MONTH CULMINATION NAGBILIN UG INSPIRASYON

Thata Manlapaz

IPIL, Zamboanga Sibugay — Usa ka makapadasig ug puno sa kahulugan nga kalihukan ang gipahigayon sa LGU Ipil isip pagtapos sa selebrasyon sa Women’s Month karong Marso 24, 2026 sa Ipil Multi-Purpose Government Center.

Ang programa nga adunay mensaheng “Atong Ipil, Atong Garbo: Babaye Pinalangga, Kanunay Protektado,” nagtumong sa pagpasidungog sa kababayen-an ug paghatag ug bili sa ilahang walay hunong nga kontribusyon sa pamilya ug katilingban.

Gipuno ang kalihukan sa nagkadaiyang aktibidad nga nagpakita sa talento ug abilidad sa mga babaye, lakip ang mga artistic presentations sama sa spoken word ug sayaw, ingon man mga diskusyon bahin sa papel sa kababayen-an sa panggamhanan. Aduna usab mga serbisyo nga direkta makatabang sa kababayen-an nga mitambong sa programa.

Sa iyahang mensahe, gipasiugda ni Governor Ann K. Hofer nga ang kababayen-an mao ang kahayag sa matag panimalay ug kusog sa komunidad. Iyahang butyag nga ang ilahang kahanas ug dedikasyon kinahanglan suportahan ug protektahan sa tanang panahon.

Dugang pa, gipadayag niya ang pagpasalamat kang Ipil Mayor Ramses Troy D. Olegario sa aktibong pakigduyog sa mga programa sa probinsya. Ang maong panaghiusa nagpalig-on sa mga proyekto alang sa kaayuhan sa katawhan.

Sa panapos nga bahin sa programa, gi-awhag ni Ipil SB Member Alberto A. Alcoriza ang tanang sektor nga magtinabangay sa paghatag ug respeto ug suporta sa kababayen-an, ug ipadayon ang paningkamot sa pagpalambo sa komunidad pinaagi sa hapsay nga pagdumala ug lig-on nga mga polisiya.

Ang maong kalihukan nagbilin ug inspirasyon sa tanang mitambong, nga nagpamatuod nga ang kalambuan sa lungsod magsugod sa pag-ila ug pag-amuma sa papel sa matag usa, labi na sa kababayen-an.