Groundbreaking Ceremony sa Agri-Tourism Complex sa Zamboanga Sibugay, Gipahigayon

Daphne Santuyo

IPIL, ZAMBOANGA SIBUGAY - Gipangunahan ni Governor Dulce Ann K. Hofer ang pagpahigayon sa groundbreaking ceremony alang sa mamahimong Agri-Tourism Complex sa lalawigan sa Zamboanga Sibugay, nga mahimutang likod sa Dr. George Tocao Hofer Medical Center sa Barangay Tenan, kagahapong adlawa.

Ang maong seremonya gisugdan pinaagi sa usa ka pag-ampo ug pagpanalangin sa lugar nga gipanguluhan ni Fr. Marvin Cenas, isip simbolo sa paghangyo sa giya ug panalangin alang sa malampusong pagpatuman sa proyekto.

Ang Agri-Tourism Complex gilauman nga mahimog sentro sa kalamboan sa agrikultura ug pangisdaan sa lalawigan. Lakip sa mga pasilidad nga ipatukod dinhi mao ang Agri-Fishery Training Center nga adunay dormitoryo, Provincial Agri-Fishery Extension Center-nga mao ang unang matang niini sa tibuok Mindanao ug compliant sa DA-ATI Directives alang sa localized extension services, Fish Pond ug Hatchery, Post-Harvest Facility and Processing Center nga adunay Mini Trading ug Pasalubong Center, mga Greenhouse, Nursery Shed, Farm Machinery Shed, pasilidad alang sa Vermi-Composting, Goat Dairy Farm, ug Poultry Farm.

Sa iyang pamahayag, gibutyag ni Gov. Ann Hofer nga dako ang iyang panglantaw nga ang musunod nga duha ka tuig mahimong matawag nga Golden Era alang sa lalawigan sa Zamboanga Sibugay. Matod niya, karon pa nahitabo nga nagkahiusa ang tanang opisyal sa lalawigan gikan sa ehekutibo ug lehislatibo, lakip na ang mga kongresista sa duha ka Distrito alang sa kalamboan sa probinsya.

Gisaysay usab sa gobernador nga ubos sa H.O.F.E.R. Agenda, diin ang letrang F nagpasabot og Food Security, dili kini ang unang proyekto sa lalawigan nga naghatag ug suporta sa sektor sa agrikultura. Una nang natukod ang usa ka pasilidad sa Barangay Suclema sa lungsod sa Ipil aron masiguro nga sa umaabot nga mga tuig, mas mapagaan ang panginabuhi sa mga mag-uuma ug mangingisda sa lalawigan.

Gipadayag usab ni Gov. Hofer ang iyang tinguha nga mapaubos ang poverty rate sa lalawigan gikan sa kasamtangang 26% ngadto sa 17%, ug unta mukanaug pa kini hangtod 10%. Dugang pa niini, namahayag siya nga adunay gigahin nga pondo ang Panggamhanang Probinsiyal aron subsidize-an ang pagpalit sa matag kilo sa humay, sa tumong nga mapadako ang kita sa mga mag-uuma.

Gihatagan usab sa gobernador ug dakong responsibilidad ang mga kontraktor nga magpatuman sa proyekto, diin iyang gipasiugda nga ang katuyoan sa pagtukod sa Agri-Tourism Complex dili alang sa ilang personal nga ganansya, kundili alang sa kaayohan ug kaanyag sa lalawigan sa Zamboanga Sibugay.

Namulong usab si Gov. Hofer ngadto sa Punong Barangay sa Tenan, Hon. Medz Far Ali, nga padayon gayud nga bantayan ang kahapsay ug kalinaw sa barangay ug bantayan ang mga magtrabaho sa proyekto, tungod kay ang unang makabenepisyo niini mao ang mga lumulupyo sa maong lugar. Mipadayag usab og pag-uyon ang Kapitan niini.

Samtang, mipahayag ug dakong pasalamat si Engr. Wesley Sayson, ang Provincial Agriculturist, sa pag-ila ni Gov. Hofer nga ang agrikultura, livestock, poultry, ug fishery mao ang nag-unang economic drivers sa lalawigan sa Zamboanga Sibugay.

Mitambong usab sa maong kalihukan si Vice Governor Richard Olegario, Atty. Christian Jay Millena, Engr. Christopher Lazo, Dr. Sherwin Bastero, kauban ang mga key officials sa DGTHMC, mga empleyado sa Provincial Agriculture Office, ug ang Provincial Veterinarian nga si Dr. Efren Davin.