LGU IPIL GIPASIDUNGGAN SA EXEMPLARY PERFORMANCE AWARD SA OFFICE OF CIVIL DEFENSE IX

Thata Manlapaz

IPIL, ZAMBOANGA SIBUGAY- Dakong kalipay ug garbo sa Local Government Unit (LGU) sa Ipil ubos sa pagdumala sa mayor nga si Ramses Troy "Rambo" D. Olegario ang pagdawat niini sa Exemplary Performance Award gikan sa Office of Civil Defense (OCD) Region IX, isip pag-ila sa maayong kahimtang ug lig-on nga pagdumala sa lungsod sa natad sa Disaster Risk Reduction and Management (DRRM).

Ang maong pasidungog nagpakita nga epektibo ug lig-on ang mga programa sa LGU Ipil sa pagpangandam sa mga kalamidad, lakip na ang hustong pagplano, koordinasyon, ug paspas nga paglihok sa panahon sa emerhensiya.

Gibase usab dinhi ang aktibong partisipasyon sa mga barangay, boluntaryo, ug ubang ahensiya nga nagtinabangay aron mapanalipdan ang kinabuhi ug kabtangan sa katawhan.

Dakong pasalamat ang gipadayag sa Local Disaster Risk Reduction and Management Office (LDRRMO) sa Ipil tungod sa ilang walay kakapoy nga dedikasyon, lig-on nga pagdumala, ug padayon nga pagbansay ug pagpahugot sa kaandaman sa komunidad. Tungod sa ilahang paningkamot, mas nahimong andam ang lungsod sa pag-atubang sa baha, linog, bagyo, ug uban pang kalamidad.

Sumala pa sa LGU Ipil, ang award dili lamang kalampusan sa lokal nga panggamhanan, kundili usa ka simbolo sa panaghiusa ug kooperasyon sa tibuok komunidad. Nagpaila kini nga kung magtinabangay ang gobyerno ug katawhan, mas lig-on ug mas luwas ang lungsod. Padayon ang LGU Ipil sa pagpalig-on sa mga programa sa DRRM aron masiguro nga andam, ug lig-on, ang lungsod sa bisan unsang hulga sa kalamidad. Tinuod nga kining pasidungog usa ka dakong garbo sa tanang Ipileños ug usa ka lakang padulong sa mas luwas ug mas malinawong kaugmaon.

Nasayran nga ang Exemplary Performance Award mao ang pinakataas nga pasidungog nga ginahatag sa OCD IX sa mga lokal nga panggamhanan sa sulod sa rehiyon.