ISYU SA DOBLENG TRICYCLE FRANCHISE NUMBERS SA IPIL, GIATUBANG SA LGU

Thata Manlapaz

Ipil, Zamboanga Sibugay- Giatubang karon sa Business Permits, Licensing, and Franchising Office (BPLFO) sa Lungsod sa Ipil ang isyu sa doble o “duplicate” nga franchise numbers sa mga tricycle drivers ug operators, human mitumaw ang reklamo gikan sa pipila ka mga drivers o operators.

Nahitabo ang usa ka panagtigom niadtong adlaw’ng Lunes, Marso 30, 2026, alas-9 kapin sa buntag, didto sa Bong Go Covered Court sa Ipil Government Center sa Taway, Ipil, Zamboanga Sibugay. Gitambungan kini sa kapin-kun-kulang 40 ka mga tricycle drivers ug operators nga apektado sa maong problema.

Ang maong panagtigom gipahigayon human nga nagpadala ug sulat ang usa ka Prosper F. Vega ngadto kang Ipil Mayor Ramses D. Olegario aron ipahibalo ang ilahang kabalaka kabahin sa duplication sa franchise numbers nga nahitabo pa sa miaging administrasyon.

Sa maong meeting, ang BPLFO girepresentar ni Mila V. Merle, nga mipasabot nga bisan pa man sa nakalabay’ng administrasyon nagsugod ang maong problema, naningkamot ang kasamtangang lokal nga panggamhanan nga makakita ug paagi aron masulbad kini.

Gipasabot sa BPLFO nga usa sa mga ginatan-aw nga solusyon mao ang paghatag ug amnestiya aron makarenew ang mga apektadong drivers sa ilahang prangkisa. Bisan pa niini, giila nga ang uban sa mga prangkisa giisip nga “colorum” tungod kay adunay bayad nga gihimo apan walay official receipt (OR), tungod sa pagbayad sa mga fixer kaniadto. Dugang pa, gisugyot nga mahimong bayaran na lamang sa mga drivers ang katunga sa kantidad sa prangkisa isip paagi sa legal nga pag-renew niini. Hinuod, matud pa ni Merle, kung unsa man ang mahimong lakang sa lokal nga panggamhanan, magdepende kin isa desisyon nga pagabuhaton sa konseho pinaagi sa usa ka ordinance.

Sa bahin sa Sangguniang Bayan, gipasalig ni SB Member Elias Dangpalan nga ilahang pagatrabahuon ang hustong lakang aron masulbad ang maong isyu. Lakip sa iyahang rekomendasyon nga dili una sitahon sa MITSOM ang mga drayber nga adunay problema sa doble nga franchise numbers samtang wala pa masulbad ang isyu.

Samtang nagpadayon ang proseso, gilauman usab nga adunay ligal nga aksyon batok sa mga indibidwal nga responsable sa ilegal nga transaksyon sa miaging administrasyon.

Sumala pa ni Vega nga nagpadala usab sa iyang sulat ngadto sa Provincial Office sa Department of the Interior and Local Government (DILG), anaa sa kapin kun kumang 300 ka mga tricycles ang apektado niining gadoble-doble nga franchise numbers nga matud pa, nagtuo sila nga legal nga nakarehistro ang ilang mga prangkisa apan sa pagsuta sa dihang murenew na unta sila karung tuga, nasayran nga walay record ang lokal nga panggamhanan niini.

Giawhag nim ga opisyales sa lungsod nga mitambong sa maong panagtigum ang mga apektadong drivers ug operators nga musumiter sa ilang indibidwal nga mga affidavits ug isaysay ang tanan nilang nasayran lakip na sa pagbutyag sa ngalan sa mga personahe nga ilang gihatagan sa ilang bayad sa nakalabay nga tuig arun nga mutumaw ang kamatuoran ug masulbad ug mahatagan ug hustisya ang maong panghitabo.

Sa kasamtangan, naglaum ang mga tricycle drivers ug operators nga mahatagan kini ug klaro ug patas nga solusyon aron makapadayon sila sa ilahang panginabuhian nga walay kahadlok sa dakop o silot.