6 ka Tricycle Drivers nagpositibo sa Drug Test atol sa Oplan Harabas 2025

Thata Manlapaz

Unom ka mga tricycle drivers ang nag positibo sa paggamit sa illegal nga droga atol sa gipahigayon nga Oplan Harabas 2025 sa Philippine Drug Enforcement Agency (PDEA) sa lalawigan sa Zamboanga Sibugay, isip pagpangandam sa Kalag-kalag.

Ang Oplan Harabas usa ka kalihukan nga ginapatuman sa PDEA sa tibook nasud ug katuyuan niini nga masigurong luwas ang mga pasahero atol sa pagsaulog sa All Saints’ Day ug All Souls’ Day pinaagi sa paglikay sa mga insidente sa kadalanan nga posibleng mahimong resulta sa mga drivers ubos sa impluwensiya sa ginadili nga droga.

Sumala pa ni Cielito E. Llano, MPM, Investigation Agent V, ang kalihukan gipahigayon sa pakigtinabangay sa nagkalain-laing mga ahensya ug organisasyon lakip na ang Panggamhanang Probinsiyal sa Zamboanga Sibugay nga gipanguluhan ni Governor Dulce Ann K. Hofer, Lokal nga Panggamhanan sa lungsod sa Ipil, Land Transportation Office (LTO), Provincial Anti-Drug Abuse Council (PADAC), Zamboanga Sibugay Media Club, Inc, uban pang local media ug mga miyembro sa Triskelion ug Eagles Fraternities.

Mukabat sa sa 405 ka mga drivers and boluntaryo nga nagpailalom sa surprise mandatory drug testing diin 392 niini ang tricycle drivers, 2 ang bus drivers, 8 ka jeepney drivers,1 ka driver sa van ug 2 ka mga drivers sa pribado nga sakyanan. 6 sa mga tricycle drivers ang miresulta isip presumptive positive atol sa inisyal nga screening.

Matud pa ni Llano ang maong specimens sa ihi isumiter alang sa pagpahigayon sa confi rmatory test ug kun ugaling makumpirmar nga positibo, ang driver irefer ngadto sa ilang tagsa-tagsa ka Barangay Anti-Drug Abuse Councils (BADAC) alang sa ilang enrollment ngadto sa community-based rehabilitation program (CBDRP).

Mipadayag si Llano sa iyang dakong pasalamat ngadto sa mga partner agencies ug mga stakeholders alang sa ilang suporta diin gitagaan niini ug gibug-aton nga ang mga joint initiatives sama sa Oplan Harabas usa ka paningkamot nga makapalig-on sa pagsiguro sa gobiyerno nga magpabiling luwas ang mga kalsada ug drug-free ang mga komunidad.