SB Member sa Salug, Zamboanga del Norte Patay sa Insidente sa Kalsada With report from Razel Vendiola

Daphne Santuyo

IPIL, ZAMBOANGA SIBUGAY – Patay ang usa ka miyembro sa Sangguniang Bayan sa lungsod sa Salug, lalawigan sa Zamboanga del Norte karung hapon lamang human nga nabangga sa usa ka kahoy ang gimaneho niini nga sakyanan didto sa Barangay Bongabong lungsod sa Leon Postigo, Zamboanga del Norte.

Giila ang biktima nga si Atty. Reil Lagare, kasamtangan nga miyembro sa Sangguniang Bayan (SB) sa lungsod sa Salug, Zamboanga del Norte.

Matud pa sa mga nakasaksi sa insidente, paingun sa lungsod sa Sindangan ang direksiyon sa gimanehong SUV sa biktma. Samtang nagsubay kini sa maong kalsada, kalit lang matud pa nga mitabok sa pikas linya ang gimaneho niini nga sakyanan ug didto nabangga kini sa kahoy nga mahogany.

Sumala pa sa inisyal nga taho, nalugpitan matud pa ang biktima sa iyang sakyanan nga mao ang posibleng hinungdan nga nakabsan kini sa iyang kinabuhi.

Dugang pamahayag sa mga nakasaksi nga ang abogadong konsehal, nag-inusara lamang sa iyang sakyanan sa pagkahitabo sa nahisgutang insidente.