LGU IPIL MAPASALAMATON NGADTO SA PANGGAMHANANG PROBINSIYAL ALANG SA MILK ASSISTANCE

Thata Manlapaz

IPIL, ZAMBOANGA SIBUGAY-Nagmapasalamaton ang Lokal nga Panggamhanan sa lungsod sa Ipil sa pagpangulo ni Mayor Ramses Troy "Rambo" D. Olegario sa 135 ka karton ug 15 ka putos sa gatas nga nadawat gikan sa buhatan ni Gov. Ann K. Hofer ubos sa programang “Tibay ng Buto Mo, Lakas at Yaman ng Lalawigan Ko.”Ang maong mga produkto giapod-apod sa Municipal Health Office (MHO) ngadto sa mga kabarangayan diin aduna nay unang natala nga mga benepisyaryo niini.

Kining inisyatibo usa ka programa nga gisugdan halos 3 ka tuig na ang nakalabay nagtinguha sa pagpalambo sa kahimsog sa mga mabdos nga ubos ug resistensiya, ug mga bata nga nag-edad 3–5 anyos.

Ang maong gatas ipanghatag lamang sa mga kuwalipikadong benipisyaryo nga mituman sa gitakda nga mga sumbanan lakip na ang regular nga pre-natal check-up, pag-inom sa gihatag nga suplemento, ug pag-apil sa mga nutrition education sessions.

ADVERTISEMENT

Matud pa sa pamahayag ni Marelene C. Garcia, ang Nutrition Action Officer sa probinsiya, dakong tabang kini sa LGU Ipil ingon man sa ubang lungsod sa probinsiya particular na ngadto sa mga malnourished nga pre-schoolers, mga kabataan nga adunay kalisod sa paglakaw tungod sa kahuyang sa bukog, ug mga mabdos nga kulang sa timbang.

Nagpadayag usab ang LGU Ipil sa dakong pasalamat ngadto sa Panggamhanang Probinsiyal tungod sa padayon nga suporta ug tinuoray nga pag-atiman ngadto sa mga katawhan. Ang maong programa usa ka timailhan sa pagtinabangay ug pagpalig-on sa komunidad pinaagi sa paghatag ug pagtagad sa nutrisyon ngadto sa tinuod nga nanginahanglan niini.