MARCELO SPINOLA, SMJSI UG MARIAN COLLEGE GIPAINIT ANG UNANG ADLAW SA 4TH RAMBO CUP

Thata Manlapaz

IPIL, ZAMBOANGA SIBUGAY- Nag-abli na ang kalingawan ug kompetisyon sa 4th Rambo Cup Inter-Highschool Basketball Tournament niadtong Disyembre 6, 2025, alas-2 ang takna sa kahapunon sa Ipil Municipal Green Court. Napulo ka eskwelahan ang nagkatigom ug nag-atbangay aron ipakita ang kusog ug abilidad sa dula nga basketball.

Paghuman sa pormal nga Opening Ceremony, gisugdan dayon ang court action nga gisalmutan sa limpyo nga dagan sa mga dula. Tulo ka games ang nag-abli sa torneyo: STII vs Marcelo Spinola School, SMJSI vs Medina College, Marian College vs Aim High Colleges. Malampuson nga nakakuha sa ilang unang kadaugan ang Marcelo Spinola, SMJSI, ug Marian College human sa ilang mga unang dula sa unang adlaw sa torneyo. Ilang gipakita ang determinasyon nga mosulod sa torneyo nga andam ug kusgan ug lig-on.

Sa ikaduhang adlaw nga panag-atubangay, ang Marcelo Spinola School mitala sa ilang ikaduhang kadaugan batok sa AMMC, nagpamatuod sa ilang lig-on nga porma niining season. Ang SMJSI, nga mao ang reigning champion, nagpakita dayon sa ilang depensa sa korona pinaagi sa lig-on nga pagsugod ug napildi niini ang Ipil National High School.

10 ka nga mga teams ang mingsalmot sa nasampit nga torneyo: Sibugay's Matthew-Jackson School Inc., Medina College, Ipil National High School, Marian College Inc., Aim High Colleges Inc., Sibugay Technical Institute Inc., Dr. Aurelio Mendoza Memorial Colleges, Marcelo Spinola School, Zamboanga Sibugay National High School, ug Ipil Shepherd Montessori Center.

Nagapadayon ang 4th Rambo Cup sa mas mainiton nga kompetisyon samtang makita ang pagpaningkamot sa matag team nga makuha ang ilang posisyon sa tournament standings. Giila nga mahinungdanon ang matag duwa, ug aduna pay panahon kung kinsa ang mopadayon sa pagpatigbabaw sa sunod nga mga adlaw.