EROPLANO MIBALIK UG LANDING SA ZC AIRPORT HUMAN NAKASINATI UG BIRD STRIKE

Daphne Santuyo

Dako ang pagpasalamat sa mga nahimong pasahero sa Philippine Airlines PAL PR 2950 nga mibiyahe na unta paingun sa kauluhan gikan sa dakbayan sa Zamboanga karung buntag lamang, Oktubre 14, 2025 diin gikatakda kining mubiyahe alas 6:30 ang takna sa buntag.

Matud pa nga ang maong eroplano, nakahinagbo ug bird strike sa dihang bag-o pa lang kining mitake-off gikan sa Zamboanga City International airport.

Gani, matud pa sa mga nakasaksi sa maong panghitabo ilabi na ang mga nanimuyo palibot sa maong airport, nabantayan nila nga lahi ang tingog sa makina sa maong eroplano ug tungod niini, nagduda sila nga posibleng aduna kini problema.

Pipila ka segundo human kining mibiya sa airport, dayun usab kining mibalik sa paglanding. Nasayran nga bag-ohay pa lang mitake-off ang maong eroplano sa dihang nakahinagbo sila ug panon sa mga langgam o ang gitawag nga “bird strike”. Sumala pa nga nasinati sa maong eroplano ang “engine vibration” ug dayon nga midesisyon ang crew niini nga mubalik sa dakbayan sa Zamboanga. Nasayran nga luwas ang tanang mga pasahero sa maong eroplano.