GUICAM-HULAHULA BRIDGE GIKATAKDANG MATAPOS SA FIRST QUARTER SA TUIG 2026

Daphne Santuyo

IPIL, ZAMBOANGA SIBUGAY – Dugay na nga gikahinaman sa mga lumulupyo sa lalawigan sa Zamboanga Sibugay ang pagtapos sa konstruksiyon sa Guicam-Hulahula Bridge. Ang maong tulay mao ang mukonektar sa Olutanga island ngadto sa mainland sa Zamboanga Sibugay.

Sa kasamtangan, anaa na sa ikalimang haligi ang konstruksiyon sa maong tulay, diin gibanabana nga anaa na kini sa tunga-tunga sa tulay ug base sa taho sa Department of Public Works and Highways (DPWH), anaa na kini sa 91% completed.

Sumala pa sa gobernador sa lalawigan nga si Dr. Dulce Ann Hofer, mibutyag matud pa ang contractor niining tula nga ginalauman nga matapos kini sa bulan sa Hunyo tuig 2026 apan nagapaningkamot pa sila karung mga panahona nga madugangan ang mga ekwipo nga ilang marentahan aron nga mas mapaspas ang trabaho, ug kun ugaling muuyon ang tanan sa ilang mga plano, posibleng matapos ang maong tulay sa bulan sa Marso, 2026. Gisegundahan usab sa Provincial Administrator sa lalawigan nga si Atty. Christian Jay Millena ang pagbutyag sa maong impormasyon.

Dugay nang gidamgo sa mga lumulupyo sa lalawigan sa Zamboanga Sibugay ang pagtukod sa maong tulay tungod kay sukad kaniadto, ang nag-unang transportasyon labi na alang sa mga lumuluyo sa Olutanga island mao ang barge, Kun ugaling matapos na ang maong tulay, mao kini ang mamahimong pinakataas nga tulay sa Zamboanga Peninsula nga mutabok sa Canalizo Strait.