ABS-CBN NAGPAGAWAS UG PAMAHAYAG SA POSIBLENG PAGTAPOS SA PARTNERSHIP TALI SA TV5

Thata Manlapaz

IPIL, ZAMBOANGA SIBUGAY- Nagpagawas ug opisyal nga pamahayag ang ABS-CBN bag-ohay pa lamang mahitungod sa posibleng matapos nga partnership niini tali sa TV5. Sumala pa sa kompanya, nakadawat sila ug notisya mahitungod sa posibilidad nga dili na ipadayon ang maong panagtimbayayong.

Gipadayag sa ABS-CBN nga ginahimo nila ang tanan aron masulbad ang isyu sa mubo nga panahon nga ilang gihatag, ug buot nilang magpabiling tin-aw sa publiko mahitungod sa nahitabo. Gibalik-lantaw sa kompanya ang kalisod nga ilang giatubang sukad nga nawala ang ilang prangkisa niadtong 2020, ilabi na sa panahon sa pandemya. Nagpadayon sila matud pa sa operasyon bisan pa man sa kalisod nga ilang gisinati, apan nagpabilin silang matinud-anon sa ilang misyon ug serbisyo ngadto sa katawhan.

Kahinumduman nga tungod kay pakyas matud pa sa pag-remit ang Kapamilya Network sa kantidad isip share ngadto sa TV5 gikan sa bayad sa mga advertisers niini, hinungdan nga gitapos sa TV5 ang maong partnership sa duha ka mga giant networks.

Dugang pa sa ABS-CBN nga ilang paningkamutan nga matuman ang mga obligasyon ug magpadayon gihapon ang ilang serbisyo sa publiko bisan pa man ug unsay mamahimong resulta sa kasamtangang kahimtang tali sa TV5.

Sa katapusan, gisiguro sa ABS-CBN nga padayon silang molihok “In the Service of the Filipino,” bisan pa man sa unsang hagit nga ilang maatubang.