TAYLOR SWIFT, MIHATAG SA KAPIN P117 MILYONES NGA DONASIYON ALANG SA MGA CHARITY NIINING PASKO

Thata Manlapaz

IPIL, ZAMBOANGA SIBUGAY- Naka-angkon ug dakong pagdayeg ang American singer-songwriter nga si Taylor Swift human niya gi-donate ang kapin P117 milyones nga kantidad sa nagkadaiyang charitable organizations isip tabang karong panahon sa Pasko.

Sumala sa usa ka post niadtong Disyembre 23, gikumpirma sa non-profit organization nga Feeding America nga mingdonar si Swift ug $1 milyon o sa kapin P58.8 milyon. Ang maong kantidad gamiton aron matabangan ang mga Amerikano nga naglisod sa pagkaon ug nagkinahanglan ug food assistance, ilabi na karong holiday season.

Sa maong adlaw usab, gipadayag sa American Heart Association (AHA) nga nakadawat sila ug $1 milyon nga donasyon gikan kang Taylor Swift. Ang donasyon gihimo isip pag-ila ug pagpasalamat sa iyahang amahan nga si Scott Swift, nga niagi ug cardiovascular disease ug mingpailalom sa quintuple bypass surgery niining tuiga. Pinaagi niini, buot ni Swift nga mosuporta sa programa sa AHA alang sa kahimsog sa kasingkasing.

Dugang pa, mibutyag usab ang MusiCares Foundation sa The Recording Academy nga nakadawat sila ug usa ka “dako ug mapinanggaon nga donasyon” gikan kang Swift. Ang maong kantidad gamiton sa ilahang mga programa, resources, ug financial assistance alang sa mga miyembro sa music community nga nagkinahanglan ug tabang, labi na kadtong naapektuhan sa kalisod sa panginabuhi ug kahimsog.

Tungod sa iyahang padayon nga pagkamanggihatagon ug kasingkasing alang sa uban, mas napalig-on pa ang imahe ni Taylor Swift dili lang isip usa ka global superstar, apan usab isip usa ka reyna sa kaayo ug pagtabang sa isigkatawo.