LGU-NAGA GIDAWAT ANG USA KA PTV GIKAN SA PCSO

Thata Manlapaz

IPIL, ZAMBOANGA SIBUGAY – Dako ang pagpasalamat sa Lokal nga Panggamhanan sa lungsod sa Naga kauban sa mga katawhan niini ngadto sa Philippine Charity Sweepstakes Office (PCSO) sa paghatag ug usa ka Patient Transport Vehicle (PTV) ngadto kanila.

Ang maong pagpasalamat gipost sa Facebook page sa mayor sa lungsod nga Mayor Jouie “Kambal” Balladares.

Matud pa sa maong post, “Ang PTV magamit pag-ayo sa paghatud sa pasyente ngadto sa tukmang pasilidad medical aron masiguro ang hapsay, luwas, ug paspas nga pag-atiman.”

Sumala pa ni Catherine Maderazo-Trapsi, usa sa mga focal persons sa buhatan sa mayor sa lungsod, niadtong bulan sa Hulyo, nakadawat ang lungsod sa Naga ug sulat gikan sa PCSO diin gipahibalo sila nga napili ang ilang lungsod nga mahatagan ug usa ka unit nga PTV ubos sa Medical Transport Vehicle Donation Program sa ilang buhatan. Dayon nga giandam sa lungsod ang mga requirements alang niini diin gikinahanglan nilang muhatag sa mga dokumento sama sa LGU Profile, sertipikasyon nga magpamatuod nga ang lungsod adunay igong budget aron nga mamaintain ang maong sakyanan, Gikinahanglan usab nila ang resolusyon gikan sa Sangguniang Bayan diin gihatagan sa authority ang mayor nga mudawat sa maong donasyon ug mupirma sa Deed of Donation, lakip na ang ID niini ug ID sa usa ka witness.

ADVERTISEMENT

Gibutyag ni Maderazo-Trapsi nga napili ang lungsod sa Naga nga makabenepisyo sa programa tungod kay kwalipikado kini sa mga criteria nga gitakda sa ahensya.

Nasayran nga niadto pa untang bulan sa Agosto ang pag-award sa maong sakyanan apan napatuman kini bag-ohay pa lamang tungod sa mga kakulian nga dili malikayan.

Ang bag-ong nadawat nga PTV sa lungsod sa Naga matud pa ni Maderazo-Trapsi, dako kaayo ang ikatabang aron nga mas mahatagan ug tubag ang panginahanglanon sa mga lumulupyo alang sa pagdala sa mga pasyenteng nanginahanglan ug dugang pagtagad ngadto sa mga tambalanan. Kasagaran matud pa silang maghatud ug pasyente ngadto sa Dr. Sale Hospital, Dr. George Tocao Hofer Medical Center ug didto sa dakbayan sa Zamboanga.

Dako ang pagpasalamat sa lungsod ngadto sa PCSO General Manager nga si Melquiades Robles sa kahigayonan nga maapil ang lungsod sa Naga sa programa sa ilang buhatan, ug ngadto sa maabtikon nga konsehal, Hon. Raul Ordeniza nga mao ang chairman sa Committee on Transportation. Si Ordeniza personal nga miuban kay Mayor Balladares ngadto sa kaulohan aron sa pagdawat sa maong PTV ug mao usab ang nangusog aron nga mapasa ang resolusyon sa lungsod.