Barangay Kagawad sa lungsod sa Imelda Patay sa Pagpamusil.

Daphne Santuyo

Ipil, Zamboanga Sibugay, May 25, 2026 - Bandang alas 9:20 sa buntag karong adlaw, Lunes, Mayo 25, 2026, nakadawat ug taho ang Imelda Municipal Police Station (MPS) mahitungod sa usa ka gituohang insidente sa pagpamusil nga nahitabo sa national highway sa Purok Santan, Barangay San Jose, lungsod sa Imelda, Zamboanga Sibugay. Diha-diha nga miresponde ang mga operatiba sa Imelda MPS ug miadto sa maong lugar aron sa pagpamatuod sa impormasyon ug pagsuta sa nahitabo.

Sa ilang pag-abot, ilang nadiskobrehan ang lawas sa usa ka lalaki nga hamtong ang pangidaron, nga nakahigda sa daplin sa kalsada ug nagkadugo, nga adunay daghang samad pinusilan sa lain-laing bahin sa lawas.

ADVERTISEMENT

Gikordonan dayon sa kapulisan ang crime scene aron mapreserbar ang ebidensya. Sa ilang inisyal nga imbestigasyon, nakaplagan ang unom (6) ka basiyo sa bala nga gituohang gikan sa kalibre .45 nga pistola.

Base sa mga testigo, ang mga suspek gituohang riding-in-tandem nga sakay sa usa ka motorsiklo nga Honda Click 125 nga walay plaka.

Sa kasamtangan, nagpadayon ang hot pursuit operation sa kapulisan aron sa posible nga pagdakop sa mga suspek, samtang gialerto usab ang mga kasikbit nga lungsod aron sa pagpahigayon og dragnet operation. Padayon pa ang imbestigasyon sa kapulisan aron matino ang motibo sa krimen ug mailhan ang mga responsable sa maong pagpamusil.