LGU-IPIL, AWARDEE SA GAWAD SERBISYONG MAHUSAY

Thata Manlapaz

IPIL, ZAMBOANGA SIBUGAY- Gipasidunggan sa Department of Social Welfare and Development (DSWD) Field Office IX ang LGU Ipil–MSWDO sa Gawad Serbisyong Mahusay atol sa 2025 PaNata Ko sa Bayan Awards nga gipahigayon sa Grand Astoria Hotel, Zamboanga City, niadtong Nobyembre 20, 2025.

Gibasehan sa DSWD alang sa maong pasidungog ang malampuson ug episyenteng pag-implementar sa MSWD-Ipil sa P.A.R.E.N.T C.A.R.E.S., usa ka pioneering program nga nagtutok sa pagpabakod sa pamilya, pagtabang sa ginikanan, ug pag-lig-on sa komunidad.

Usa sa labing mahinungdanon nga rason mao ang hinabang nga gihatag sa MSWD-Ipil ngadto sa mga ginikanan sa kabataang nabiktima sa pang-abuso sa usa ka barangay sa lungsod sa Ipil, Ang mga ginikanan nakadawat sa kantidad nga ₱300,000 isip inisyal nga capital gikan sa DSWD pinaagi sa Sustainable Livelihood Program (SLP).

Ang pasidungog personal nga gidawat ni SB Member Alberto “Jong” A. Alcoriza isip representante sa LGU Ipil. Gibutyag sa DSWD nga ang kalampusan sa programa dili mabuhat kung wala ang kusganong liderato ug suporta sa Mayor sa Ipil, Hon. Ramses Troy “Rambo” D. Olegario, nga naghatag ug klarong direksyon sa pagpalambo sa mga programa alang sa kaayuhan sa pamilya ug lungsod. Kining pasidungog nagpakita sa padayon nga pagka-manggiangayon, pagkugi, ug dedikasyon sa LGU Ipil sa paghatag ug maayong kalidad nga serbisyo sa katilingban alang sa mga lumulupyo sa lungsod.