GARY GRANADA NAKATAKDANG MAGPAHIGAYON UG MGA WORKSHOPS SA LUNGSOD SA MALANGAS

Daphne Santuyo

IPIL, ZAMBOANGA SIBUGAY – Nakatakdang magpahigayon ug duha ka adlaw nga workshop ang inilang singer/songwriter nga si Gary Granada sa lungsod sa Malangas, Zamboanga Sibugay isip parte sa kasaulugan sa Maralag Festival.

Sabado sa hapon, Disyembre 6, 2025, ipahigayon ang Songs and Society Workshop sa Budget Hotel and Resort alang sa mga magtutudlo sa lungsod sa Malangas. Ang maong workshop usa ka pagtuon sa pagsulat ug mga awit nga adunay kalambigitan sa mga panghitabo sa katilingban ug sa nasud. Mao kini ang klase sa mga kanta nga mag-impluwensiya sa panghuna-huna sa mga katawhan, maghatag ug inspirasyon sa katilingban aron sa pagtukod ug mas lig-on nga mga komunidad.

Sa ikaduhang adlaw, ipahigayon ang Songwriting Workshop. Limitado kini ngadto sa 30 lamang ka mga partisipante ug adunay registration fee nga P1,000 nga mu-cover sa kantidad sa workshop kit, lakip na usab ang pagkaon. Nasayran nga ang maong workshop nakatutok sa pagtudlo sa mga partisipante sa insaktong pamaagi sa pagsulat ug mga awit lakip na usab ang paghimo sa tono niini.

Si Gary Granada usa ka inilang mang-aawit dili lamang tungod sa iyang maanindot nga tingog kundili tungod sa mga pulong niini sa iyang mga kanta nga tukma sa panghitabo sa nasud. Kadaghanan sa iyang mga awit nagahisgot sa mga isyu sa katilingban, kalisud, kadawad-on sa hustisya sa nasud, diin ginagamit niini ang iyang musika isip usa ka pamaagi sa adbokasiya ug kabag-uhan nga nagahatag ug inspirasyon lakip na usab ang pagmata sa huna-huna sa mga tigpaminaw.

Pila sa mga inilang kanta nga gisulat ug giawit ni Gary mao ang Bahay, Mabuti pa Sila, ug ang nahimong grand prize winner sa Himig Handog sa Bayaning Pilipino sa ABS-CBN niadtong tuig 2000, Ka Bayani.