ICMC NAGSAULOG SA 20 KA TUIG: MALAMPUSONG GENERAL ASSEMBLY NAGPAKITA SA PADAYONG KALAMBUAN SA KOOPERATIBA

Thata Manlapaz

IPIL, Zamboanga Sibugay - Malampuson nga gipahigayon ang ika-20 nga Annual General Assembly sa Ipil Community Multipurpose Cooperative (ICMC) niadtong Marso 20, 2026, Biyernes alas-8 kapin ang takna sa kabuntagon sa Jackie’s Hotel & Restaurant sa lungsod sa Ipil.

Sa tema nga “Harvesting Success, Seeding Tomorrow: Two Decades of Cooperative Growth,” gipakita sa kalihukan ang dako nga kalampusan ug padayon nga pagtubo sa kooperatiba sulod sa 20 ka tuig nga pag-alagad sa komunidad.

Gipangulohan ni ICMC Chairperson Masdi A. Hadim ang programa kinsa nagpasalamat sa padayon nga suporta sa mga miyembro. Usa sa mga importante nga bahin sa programa mao ang mensahe sa guest speaker nga si Atty. Socrates P. Villota, Provincial Cooperative Officer. Sa iyahang pakigpulong, iyahang gitagaan ug gibug-aton ang kamahinungdanon sa kooperatiba sa pagpalambo sa ekonomiya ug pagtabang sa panginabuhian sa mga miyembro, ilabi na sa probinsya sa Zamboanga Sibugay.

Naghatag usab ug mensahe ang pipila ka mga opisyales sa gobyerno ug lain-laing ahensya. Lakip niini si Ipil Mayor Ramses Troy D. Olegario nga mipahayag sa iyahang suporta ug pagpasalamat sa kontribusyon sa ICMC sa pagpauswag sa lokal nga ekonomiya. Sa business meeting, gihisgutan ang daghang importanteng mga butang sama sa pagbasa sa minutes sa miaging General Assembly, presentasyon sa report sa chairman, financial statement, ug performance audit report. Gisaysay usab ang plano sa badyet alang sa tuig 2026 ug ang mga programa nga ipatuman sa umaabot nga mga bulan.

Gipresentar usab ang mga proposal nga ipasabut ug aprubahan sa General Assembly, lakip na ang pagtaas sa maximum loanable amount ug ATM loan aron mas mapalapad pa ang serbisyo ug mas daghang miyembro ang makabenepisyo.

Human sa tanang diskusyon, gipahigayon ang eleksyon sa mga bag-ong opisyal sa kooperatiba ug dayon gipahigayon ang ilahang proklamasyon ug oath-taking ceremony. Ang maong kalihukan natapos pinaagi sa pormal nga adjournment.

Sa kinatibuk-an, ang selebrasyon sa ika-20 nga anibersaryo sa ICMC nagpakita sa lig-on nga panaghiusa sa mga miyembro ug opisyales. Nagpadayon ang ilahang paningkamot nga mapalambo ang serbisyo ug madugangan ang benepisyo alang sa tanang miyembro ug sa tibuok komunidad sa Zamboanga Sibugay.